ஆஸ்திரேலிய கிரிக்கெட் வீரர்களுக்கு உசைன் போல்ட் சிறப்புப் பயிற்சி!

இங்கிலாந்து உடனான ஆஷஸ் தொடரில் பங்கேற்கும் ஆஸ்திரேலிய வீரர்களுக்கு தடகள வீரர் உசைன் போல்ட் சிறப்புப் பயிற்சியளித்தார்.

ஆண்டுதோறும் இங்கிலாந்து மற்றும் ஆஸ்திரேலியா அணிகளுக்கு இடையே ஆஷஸ் டெஸ்ட் தொடர் நடப்பது வழக்கம். அதன்படி இந்த ஆண்டும், ஆஸ்திரேலியாவில் 5 போட்டி கொண்ட டெஸ்ட் தொடர் நடைபெற உள்ளது.

இந்தத் தொடரில் பங்கேற்பதற்காக இங்கிலாந்து அணி ஆஸ்திரேலியா சென்றுள்ளது. இவ்விரு அணிகளுக்கும் இடையேனான முதல் டெஸ்ட் போட்டி வரும் 23ஆம் தேதி பிரிஸ்பெயினில் தொடங்க உள்ளது.

இதற்கு முன்னதாக உலகின் பிரபலமான தடகள வீரரான உசைன் போல்ட், விக்கெட்களுக்கு இடையே எப்படி வேகமாக ஓடுவது என்பது பற்றி ஆஸ்திரேலிய வீரர்களுக்கு சிறப்புப் பயிற்சி அளித்தார்.

இந்தப் பயிற்சியில் ஆஸ்திரேலிய வீரர்கள் மேக்ஸ்வெல், ஆரன் பென்ச், ஆஸ்டன் அகர், பீட்டர் ஹென்ட்காம்ப் ஆகியோர் பங்கேற்றனர். பயிற்சிக்குப் பின் உசைன் போல்ட் ஆஸ்திரேலிய வீரர்களுடன் கிரிக்கெட் விளையாடி மகிழ்ந்தார்.