கிரிக்கெட்டைவிட்டாலும் சேவக்கை விடாத கிரிக்கெட்!

இந்திய கிரிக்கெட் வீரர் சேவக், ஓய்வு பெற்ற போதும் அவரைத்தேடி வாய்ப்பு வந்து கொண்டே உள்ளது.

இந்திய கிரிக்கெட் அணியின் அதிரடி மன்னாக திகழ்ந்தவர் சேவக். சர்வதேச கிரிக்கெட்டில் இருந்து இவர் ஓய்வு பெற்ற பின், 140 வார்த்தைகள் மட்டும் உள்ளடக்கிய மைக்ரோ சமூக வலைதளமான ‘டுவிட்டரில்’ நக்கல் மன்னனாக ஒருவரையும் விடாமல் கலாய்த்து வருகிறார் சேவக்.

சர்வதேச அளவில் ஓய்வு பெற்ற வீரர்கள் மட்டும் பங்கேற்கும், ‘ஆல்-ஸ்டார்’ கிரிக்கெட் அமெரிக்காவில் நடத்தப்பட்டது. இதில் கலந்து கொள்ள வேண்டும் என்பதற்காக, இத்தொடர் துவங்க சில நாட்களுக்கு முன் சர்வதேச ஓய்வை அறிவித்தார்.

அதேபோல் ஆல்-ஸ்டார் கிரிக்கெட் தொடரிலும் சேவக் விளையாடினார். இவர் கிரிக்கெட்டை விட்டாலும், கிரிக்கெட் இவரை விடுவதாக இல்லை. சமீபத்தில் தமிழகத்தில் மட்டும் நடந்த தமிழக பிரிமியர் லீக் கிரிக்கெட் தொடரில் இவரின் பங்கு இருந்தது.

தற்போது இந்தியாவின் சினிமா நட்சத்திரங்கள் மட்டும் பங்கேற்கும், செலிபிரட்டி கிரிக்கெட் லீக்கில் சேவக் பங்கேற்கவுள்ளதாக அறிவிக்கப்பட்டுள்ளது. இத்தொடரில் இவரைத்தவிர, முன்னாள் வீரர்களான ஜாகிர் கான், வெஸ்ட் இண்டீஸ் வீரர் பிரைன் லாரா, தென் ஆப்ரிக்காவின் காலிஸ், ஜாண்டி ரோட்ஸ், ஆஸ்திரேலியாவின் சைமண்ட்ஸ், நியூசிலாந்தின் டேனியல் வெட்டோரி, இலங்கையின் சங்ககரா ஆகியோரும் இத்தொடரில் பங்கேற்கின்றனர்.