‘உலகக் கோப்பை அணியில்’…இந்த பையனுக்கு நிச்சயம் இடம் இருக்கு: சொதப்பல் வீரருக்கு ரோஹித் ஆதரவு!

இந்தியா வரும் இலங்கை அணி பிப்ரவரி 24 முதல் மூன்று போட்டிகள் கொண்ட டி20 தொடரில் பங்கேற்று விளையாடவுள்ளது. போட்டிகள் 24, 26, 27 ஆகிய தேதிகளில் லக்னோ, தர்மசாலா, தர்மசாலா மைதானங்களில் நடைபெறும். இதற்கான இந்திய அணியிலிருந்து விராட் கோலி, ரிஷப் பந்த் ஆகியோர் விலகி, ஓய்வுக்கு சென்றுள்ளனர். கே.எல்.ராகுல், சூர்யகுமார் யாதவ், தீபக் சஹார் ஆகியோர் காயம் காரணமாக விலகியுள்ளனர்.

இவர்களது இடத்தை பூர்த்திசெய்ய ருதுராஜ் கெய்க்வாட், இஷான் கிஷன், சஞ்சு சாம்சன் போன்ற இளம் வீரர்கள் சேர்க்கப்பட்டுள்ளனர். இவர்களில் சஞ்சு சாம்சனை அணியில் சேர்த்ததுதான் ரசிகர்கள் மத்தியில் அதிக கவனம் பெற்றுள்ளது. காரணம், இவர் மோசமான பார்மில் இருந்ததால்தான், இந்திய அணியில் இடம் பிடிக்க முடியாமல் இருந்து வந்தார். சமீபத்தில் நடைபெற்ற சையத் முஷ்டாக் அலி தொடர், விஜய் ஹசாரே டிராபி தொடரில்கூட இவரது ஆட்டம் மோசமாகத்தான் இருந்தது. இவர் தற்போது அணியில் இணைந்திருப்பது, பேசு பொருளாக மாறியுள்ளது.

ரோஹித் பேட்டி:

இந்நிலையில் இந்த விஷயம் குறித்து இந்திய அணிக் கேப்டன் ரோஹித் ஷர்மா விளக்கமளித்துள்ளார். அதில், “சஞ்சு சாம்சன் மிகவும் திறமையான வீரர். ஐபிஎல் தொடரில் இவரது ஆட்டத்தை பார்ப்பதற்கே மிகவும் அற்புதமாக இருக்கும். தனது திறமையை மிகச்சரியான முறையில் வெளிப்படுத்த கூடியவர். ஒருவருக்கு என்னதான் திறமை இருந்தாலும், அதனை சரியாக வெளிப்படுத்துவது என்பது ஒரு கலை. அது சாம்சனிடம் இருக்கிறது. தற்போது இந்திய அணி நிர்வாகம், தனி வீரரின் திறனை மேம்படுத்த முயற்சியை மேற்கொண்டு வருகிறது” எனக் கூறினார்.

மேலும் பேசிய அவர், “சாம்சனுக்கு வாய்ப்பு கிடைக்கும் போதெல்லாம், அவர் மீது முழு நம்பிக்கை வைத்து, அவர் சிறப்பாக செயல்பட உறுதுணையாக இருப்போம். வரும் அக்டோபரில் ஆஸ்திரேலியிவில் துவங்கவுள்ள டி20 உலகக் கோப்பை தொடரில் சாம்சன் நிச்சயம் விளையாடுவார். இதற்காக நாங்கள் யோசித்துக்கொண்டு இருக்கிறோம். இந்த ஒரு காரணத்திற்காகத்தான் சாம்சனுக்கு இலங்கை தொடரில் வாய்ப்பு வழங்கப்பட்டுள்ளது” எனத் தெரிவித்தார்.