‘மகளிர் ஐபிஎல்’…இன்று துவக்கம்: எதில் பார்க்க முடியும்? ஓடிடியில் பார்க்க முடியுமா? ஸ்டார், சோனி இல்லை..விபரம் இதோ!

மகளிர் கிரிக்கெட்டின் புதிய அத்தியாயமான மகளிர் பிரிமியர் லீக் தொடர் இன்றுமுதல் துவங்கி நடைபெறவுள்ளது.

ஆடவர் கிரிக்கெட்டிற்கு இணையாக சமீப காலமாக மகளிர் கிரிக்கெட்டிற்கும் ஆதரவு பெருகி வருவதால்தான், இந்த மகளிர் பிரிமியர் லீக் தொடரை பிசிசிஐ அறிமுகப்படுத்தியுள்ளது. டெல்லி, மும்பை, பெங்களூர், அகமதாபாத், லக்னோ ஆகிய ஐந்து அணிகள் தற்போது முதல் சீசனில் பங்கேற்க உள்ளது.

எப்போது துவங்கும்:

போட்டிகள் இன்றுமுதல் துவங்கி மார்ச் 26ஆம் தேதிவரை நடைபெறவுள்ளது. மொத்தம் 22 போட்டிகள் நடக்க உள்ளது. அனைத்து போட்டிகளும் மும்பையில் உள்ள டி ஓய் படேல் ஸ்டேடியத்திலும், பராபோர்ன் ஸ்டேடியத்திலும் துவங்கி நடைபெறும்.

இத்தொடரின் லீக் சுற்றுகள் முடிவில், முதலிடம் பிடிக்கும் அணி நேரடியாக இறுதிப் போட்டிக்கு தகுதிபெற்றுவிடும். இரண்டாவது, மூன்றாவது இடம் பிடிக்கும் அணிகள் எலிமினேட்டர் போட்டியில் மோதி, அதில் வெற்றிபெறும் அணி இறுதிப் போட்டிக்கு முன்னேறும்.

எத்தனை வெளிநாட்டு வீராங்கனைகள்:

ஆடவர் ஐபிஎல் கிரிக்கெட்டைப் போலவே, மகளிர் ஐபிஎல் கிரிக்கெட்டிலும் ஒவ்வொரு அணியும் தலா 5 வெளிநாட்டு வீராங்கனைகளை பயன்படுத்தலாம். ஆனால், அதில் ஒரு வெளிநாட்டு வீரங்கனை அசோசியட் நேசன் அதாவது அண்டை நாட்டைச் சேர்ந்தவராக இருத்தல் வேண்டும்.

இன்றைய முதல் லீக் ஆட்டத்தில் இந்திய அணிக் கேப்டன் ஹர்மன் பிரித் கவுர் தலைமையிலான மும்பை இந்தியன்ஸ் மகளிர் அணியும், ஆஸ்திரேலிய அதிரடி வீராங்கனை பெத் மூனி தலைமையிலான குஜராத் ஜெயின்ஸ் அணியும் பலப்பரீட்சை நடத்துகின்றன.

இதில் பார்க்க முடியும்?

மகளிர் கிரிக்கெட்டை நேரடியாக பார்க்க வேண்டும் என்றால், 100 ரூபாய் டிக்கெட் பெற்று பார்க்க முடியும். இத்தொடரை ஸ்போர்ட்ஸ் 18 சேனல் ஒளிபரப்ப உள்ளது. தமிழில் காண, தமிழ் கலர்ஸ் சேனலை தேர்வு செய்ய வேண்டும். ஓடிடியை பொறுத்தவரை ஜியோ சினிமா நேரலை செய்ய உள்ளது.