IND vs NZ 2nd Test: ‘இந்திய அணி’…விக்கெட் கீப்பரை ஓபனரா களமிறக்கணும்: வாசிம் ஜாப்பர் செம்ம ஐடியா!

இந்தியா, நியூசிலாந்து இடையிலான இரண்டு போட்டிகள் கொண்ட டெஸ்ட் தொடர் தற்போது துவங்கி நடைபெற்று வருகிறது. இதில், முதல் போட்டியின் இரண்டாவது இன்னிங்ஸில் இந்திய அணி விக்கெட் கீப்பர் பேட்ஸ்மேன் விருத்திமான் சாஹா 126 பந்துகளில் 61* ரன்கள் அடித்ததால், நியூசிலாந்து அணிக்கு 284 ரன்களை இலக்காக நிர்ணயம் செய்ய முடிந்தது. தற்போது கடைசி நாளான இன்று நியூசிலாந்து அணி இலக்கை துரத்தி விளையாடி வருகிறது.

கோலி ரிட்டர்ன்:

தற்போது ஓய்வில் இருக்கும் விராட் கோலி, அடுத்து டிசம்பர் 3ஆம் தேதி மும்பையில் துவங்கவுள்ள இரண்டாவது போட்டியில் களமிறங்கவுள்ளார். இதனால் பார்ம் அவுட்டில் இருக்கும் மயங்க் அகர்வால், அஜிங்கிய ரஹானே இருவரில் ஒருவர், இரண்டாவது போட்டியின்போது பெஞ்சில் அமர்வது உறுதியாகியுள்ளது.

ஜாப்பர் கருத்து:

இந்த விவகாரம் குறித்து முன்னாள் வீரர் வாசிம் ஜாப்பர் கருத்து தெரிவித்துள்ளார். அதில், “அடுத்த போட்டியில் கோலி களமிறங்கவுள்ளதால், மயங்க் அல்லது ரஹானே இருவரில் ஒருவர் நீக்கப்படலாம். இருவரும் பார்ம் அவுட்டில் இருக்கிறார்கள். ரஹானே மெல்போர்னில் நடைபெற்ற போட்டிக்குப் பிறகு 10-12 டெஸ்ட்களில் சிறப்பாக விளையாடவில்லை. தற்போது முதல் டெஸ்டிலும் ரன்களை குவிக்கவில்லை. மயங்க் அகர்வால், காயத்திலிருந்து மீண்டு வந்து முதல் போட்டியில் பெரிய ஸ்கோர் அடிக்கவில்லை. இருவரும் திறமையை நிரூபிக்க வேண்டிய இடத்தில் இருக்கிறார்” எனக் கூறினார்.

மேலும் பேசிய அவர், “ஒருவேளை மயங்க் அகர்வால் நீக்கப்பட்டால், விருத்திமான் சாஹாவை ஓபனராக களமிறக்க வேண்டும். அப்போதுதான் பேட்டிங் வரிசை சரியாக இருக்கும். மயங்கை நீக்கி, ஒன் டவுன் பேட்ஸ்மேன் புஜாராவை ஓபனராக களமிறக்கினால், அடுத்தடுத்த பேட்டிங் வரிசையை முழுமையாக மாற்றியமைக்க வேண்டிய நிலை ஏற்படும். இதனால், மயங்கை நீக்கினால், சாஹாவைத்தான் ஓபனராக களமிறக்க வேண்டும். சாஹாவுக்கு ஓபனராக களமிறங்கிய அனுபவம் இருக்கிறது” எனத் தெரிவித்தார்.

“ராஹானேவை நீக்கினால், சூர்யகுமார் யாதவ் களமிறங்க வாய்ப்பு கிடைக்கும். பிரச்சினை இருக்காது. ஆனால், என்னைக் கேட்டால் மயங்கைத்தான் நீக்க வாய்ப்புள்ளது” என்றார்.