WTC Final: 'இதை செய்தால் மட்டும்தான்'...ஆஸியை காலி செய்ய முடியும்: ரன் குவிப்பில் டிராவிஸ் ஹெட்!

டெஸ்ட் சாம்பியன்ஷிப் பைனலில் இந்தியா, ஆஸ்திரேலியா ஆகிய அணிகள் மோதி வருகின்றன. இங்கிலாந்து ஓவலில் துவங்கியுள்ள இப்போட்டியில் டாஸ் வென்ற இந்திய அணி முதலில் பந்துவீச்சைத் தேர்வு செய்தது.

2015-ல் தென்னாப்பிரிக்காவுக்கு எதிரான டெஸ்டிற்கு பிறகு, இந்திய அணி டாஸ் வென்று முதலில் பந்துவீச்சைத் தேர்வு செய்திருக்கிறது.

ஆஸி இன்னிங்ஸ்:

பிட்ச் முழுக்க முழுக்க வேகத்திற்கு சாதகமாக இருந்ததால், இந்திய பௌலர்கள் துவக்கத்தில் பெரிய தாக்கத்தை ஏற்படுத்துவார்கள் எனக் கருதப்பட்டது. இறுதியில் அதேபோல்தான் நடந்தது. உஸ்மான் கவாஜாவை 0 (10) முகமது சிராஜ் டக் அவுட் ஆக்கினார்.இதனைத் தொடர்ந்து, முதல் செஷனின் இறுதிக் கட்டத்தில் டேவிட் வார்னர் 43 (60) ஆட்டமிந்தார். இதனால், ஆஸ்திரேலிய அணி முதல் செஷன் முடிவில் 73/2 என இருந்தது.

முதல் பந்தில் விக்கெட்:

இதனைத் தொடர்ந்து இரண்டாவது செஷன் துவக்கத்தில், முதல் பந்திலேயே லபுஷேன் 26 (62) முகமது ஷமியின் இன் ஸ்விங் பந்தில் ஆட்டமிழந்து நடையைக் கட்டினார். அவ்வளவுதான், அடுத்து ஸ்டீவ் ஸ்மித் மற்றும் டிராவிஸ் ஹெட் இருவரும் பெரிய பார்ட்னர்ஷிப் அமைக்க ஆரம்பித்தனர்.

இந்த இடது, வலது கை பார்ட்னர்ஷிப் சிறப்பாக செயல்பட்டது. ஒருபக்கம் ஸ்மித் நிதானம் காட்ட, மறுபக்கம் டிராவிஸ் ஹெட் அதிரடியாக விளையாடி ரன்களை குவிக்க ஆரம்பித்தார். இரண்டாவது செஷன் முடிவு வரை ஸ்மித் 33 (103), டிராவிஸ் ஹெட் 60 (75) ஆகியோர் ரன்கள் எடுத்து களத்தில் இருக்கிறார்கள். ஆஸ்திரேலிய ணி 170/3 ரன்களைகுவித்துள்ளது.

இதை செய்தே ஆகணும்:

ஆஸ்திரேலிய அணி தற்போது கிட்டதட்ட வலுவான நிலையில்தான் இருக்கிறது. வேகத்திற்கு சாதகமான இந்த பிட்சில் சிறப்பாக பேட்டிங் செய்து வருகிறது. இந்திய அணி கடைசி செஷனின் மூன்று விக்கெட்கள் வரை வீழ்த்தினால் மட்டும்தான், முதல் இன்னிங்ஸில் ஓரளவுக்கு பின்னடைவை சமாளிக்க முடியும். இல்லை என்றால், ஆஸி அணி முதல் இன்னிங்ஸில் அபார முன்னிலை பெற வாய்ப்புள்ளது.