T20 World Cup 2022: வெளியானது அட்டவணை…போட்டி நடைபெறும் இடம் இதுதான்: வங்கதேச அணி மகிழ்ச்சி!

ஆடவர்களுக்கான 7ஆவது டி20 உலகக் கோப்பை சமீபத்தில் நடந்து முடிந்து, ஆஸ்திரேலிய அணி கோப்பை வென்ற நிலையில், அடுத்த ஆண்டு நடைபெறவுள்ள 8ஆவது டி20 உலகக் கோப்பை தொடருக்கான அட்டவணை தற்போது வெளியாகியுள்ளது.

இத்தொடர் அடுத்த ஆண்டு அக்டோபர் 16 முதல் நவம்பர் 13 வரை ஆஸ்திரேலியாவில் நடைபெறவுள்ளது. மொத்தம் 45 போட்டிகள் அடிலைட், பிரிஸ்பேன், கீலாங், ஹாபர்ட், மெல்போர்ன், பெர்த் மற்றும் சிட்னி ஆகிய மைதானங்களில் நடைபெறும். அரையிறுதிப் போட்டி நவம்பர் 9, 10 ஆகிய தேதிகளில் சிட்னி மற்றும் அடிலைட் மைதானத்திலும், இறுதிப் போட்டி மெல்போர்ன் மைதானத்தில் நவம்பர் 13ஆம் தேதியும் நடைபெறும்.

தற்போது நடைபெற்று முடிந்த டி20 உலகக் கோப்பையைப் போலவே முதல் சுற்று, சூப்பர் 12 சுற்று, அரையிறுதி, இறுதிப் போட்டிகளை நடத்த ஐசிசி திட்டமிட்டுள்ளது.

இந்த சூப்பர் 12 சுற்றுக்கு ஆஸ்திரேலியா, நியூசிலாந்து, இங்கிலாந்து, இந்தியா, பாகிஸ்தான், தென்னாப்பிரிக்கா, ஆப்கானிஸ்தான், வங்கதேசம் ஆகிய அணிகள் தகுதிபெற்றுவிட்டன. இலங்கை, மேற்கிந்தியத் தீவுகள், ஸ்காட்லாந்து, நமீபியா மற்றும் 4 நான்கு அணிகள் முதல் சுற்றிலிருந்து விளையாடி வர வேண்டும். 7ஆவது டி20 உலகக் கோப்பை சூப்பர் 12 சுற்றில் மேற்கிந்தியத் தீவுகள் அணி இடம்பெற்றிருந்தது. வங்கதேசம் முதல் சுற்றிலிருந்து விளையாடி வந்தது என்பது குறிப்பிடத்தக்கது.