24வது பிறந்த நாள்
இப்படி சாதனைகளின் பட்டியல் நீண்டு கொண்டே செல்கிறது. கத்தாரில் நடந்த உலகக்கோப்பை கால்பந்து 2022 தொடரில் அர்ஜென்டினா, பிரான்ஸ் இடையிலான இறுதிப் போட்டியை வாழ்நாளில் மறக்க முடியாத நிகழ்வாக மாற்றியதில் கிலியன் எம்பாப்பேவிற்கு மிக முக்கிய பங்குண்டு. இவர் நேற்று (டிசம்பர் 20) தனது 24வது பிறந்த நாளை கொண்டாடியுள்ளார். பிரான்ஸ் கால்பந்து அணியின் பார்வர்டு பொசிசஷினில் விளையாடி வரும் இவரின் பின்னணி குறித்து அறிந்து கொள்ள பலரும் ஆர்வம் காட்டி வருகின்றனர்.
6 வயதில் தொடங்கிய ஆட்டம்
பிரான்ஸ் தலைநகர் பாரிஸில் டிசம்பர் 20, 1998ல் பிறந்தவர் கிலியன் எம்பாப்பே. இவரது தந்தை வில்பிரட் எம்பாப்பே. தாய் ஃபைசா லமாரி. கிலியன் எம்பாப்பேவின் தந்தை கேமரூன் பூர்வீகத்தையும், தாய் அல்ஜீரிய பூர்வீகத்தையும் கொண்டவர். தனது 6 வயதிலேயே AS Bondy கிளப்பிற்காக கால்பந்து விளையாட தொடங்கிவிட்டார். இவரின் தந்தை கால்பந்து பயிற்சியாளர் என்பது குறிப்பிடத்தக்கது.
தீவிர பயிற்சி
தந்தையும், பயிற்சியாளர் அன்டோனியோ ரிக்கார்டி ஆகியோரும் சேர்ந்து எம்பாப்பேவிற்கு கால்பந்து பயிற்சியை அளித்து வந்தனர். இவரின் திறமை வெளியுலகிற்கு தெரிய வரவே பிரான்ஸ் நாட்டின் இளம் கால்பந்து வீரர்கள் பயிற்சி பெறும் க்ளைர்ஃபோன்டெய்னில் சேர்க்கப்பட்டார். அங்கு தான் எம்பாப்பே வாழ்க்கை அடுத்தகட்டத்திற்கு சென்றது. இவருடைய திறமைகள் பட்டை தீட்டப்படவே கிளப் போட்டிகளில் அசாத்தியமாக விளையாடத் தொடங்கினார்.
கோல் மழை
11 வயதில் லண்டன் சென்று செல்சீ யூத் அணிக்காக விளையாட தீவிரம் காட்டினார். ஆனால் அது எடுபடாமல் போகவே பிரான்ஸ் திரும்பி லீக் 1ல் ஆடும் AS Monaco FC கிளப்பிற்காக விளையாட தொடங்கினார். முதல்முறை டிசம்பர் 2, 2015ல் தனது 16 வயதில் Monaco கிளப்பிற்காக விளையாடினார். இவரது திறமையை கண்ட Monaco அணி 3 ஆண்டுகளுக்கு ஒப்பந்தம் செய்தது. படிப்படியாக கோல் அடித்து 2016 டிசம்பர் 14ல் முதல் ஹாட்ரிக் அடித்து அசத்தினார்.
தேசிய அணியில் எம்பாப்பே
இவரது ஆட்டத் திறமை அணியின் வெற்றிக்கு பெரிதும் உதவிகரமாக இருந்தது. கூடவே சாதனைகளும் குவியத் தொடங்கின. Monaco U19, Monaco B, Monaco என கிளப்பின் அடுத்தடுத்த நிலைகளுக்கு மாறினார். இவரது கோல் மழை Monaco அணியை லீக் 1 கோப்பையை வெல்ல உதவியது. இதற்கிடையில் பிரான்ஸ் தேசிய அணியில் 19 வயதுக்கு உட்பட்டோருக்கான அணியில் இடம்பிடித்தார்.
முதல்முறை பி.எஸ்.ஜி வாய்ப்பு
படிப்படியாக உயர்ந்து பிரான்ஸ் தேசிய அணியில் 2017ல் முதல்முறை ஆடினார். மறுபுறம் லீக் 1 விளையாடும் ஜாம்பவான் கிளப்பாக விளங்கும் பி.எஸ்.ஜியில் லோன் மூலம் விளையாடும் வாய்ப்பு எம்பாப்பேவிற்கு கிடைத்தது. இந்த அணியில் ஆடி ஐரோப்பிய ஜாம்பவான் அணிகளுடன் கோல் அடித்து மிரட்டினார். இந்த சூழலில் 2018 ரஷ்ய உலகக்கோப்பை தொடருக்கான பிரான்ஸ் அணியில் இடம்பிடித்தார்.
2018 உலகக்கோப்பை
இந்த தொடரில் முதல் கோல், ஒரே போட்டியில் டபுள் கோல், Man of the Match விருது, இறுதிப் போட்டியில் கோல், Best Young Player Award என வரிசையாக சாதனைகளை படைத்தார். ஒருகட்டத்தில் உலகின் மிகப்பெரிய கால்பந்து கிளப்களாக விளங்கும் ரியல் மாட்ரிட், மான்செஸ்டர் சிட்டி, பேயர்ன் முஞ்ச், லிவர்பூல் என பலரும் கிலியன் எம்பாப்பேவை ஒப்பந்தம் செய்ய முயற்சித்தனர். இந்நிலையில் பி.எஸ்.ஜி அணி கிலியன் எம்பாப்பேவை ஒப்பந்தம் செய்து தங்கள் அணி வீரராகவே மாற்றி விட்டது.
ரொனால்டோ ரசிகர்
தற்போது லீக் 1, சாம்பியன்ஸ் லீக், UEFA நேஷன்ஸ் லீக், பிரான்ஸ் தேசிய அணி, கோபா டி பிரான்ஸ், உலகக்கோப்பை என அனைத்திலும் அற்புதமாக கோல்களை அடித்து உலக அரங்கை திணறடித்து வருகிறார். இவரது வேகத்தை பார்த்தால் மெஸ்ஸி, ரொனால்டோ சாதனைகள் எல்லாம் விரைவில் ஓரங்கட்டி விடுவார் என்று எதிர்பார்க்கப்படுகிறது. இதில் சுவாரஸிய விஷயம் என்னவென்றால் கிலியன் எம்பாப்பே சிறு வயது முதலே ரொனால்டோவின் தீவிர ரசிகர் என்பது குறிப்பிடத்தக்கது.