ஹாக்கியில் தங்கம் வென்று வரலாறு படைத்தது அர்ஜெண்டினா

ரியோ : ஒலிம்பிக் ஆண்களுக்கான ஹாக்கி போட்டியில் முதன் முறையாக அர்ஜெண்டினா அணி தங்கப்பதக்கத்தை வென்று வரலாற்றில் இடம் பெற்றுள்ளது.

ஆண்களுக்கான ஹாக்கி இறுதிப்போட்டி இந்திய நேரப்படி இன்று அதிகாலை நடந்தது. இதில் அர்ஜெண்டினா மற்றும் பெல்ஜியம் அணிகள் மோதின. விறுவிறுப்பாக நடைபெற்ற போட்டியின் முதல் பாதியில் அர்ஜெண்டினா அணி 3 -1 என்ற கணக்கில் முன்னிலை பெற்றிருந்தது.

இரண்டாம் பாதில் முட்டி மோதிப் பார்த்த பெல்ஜியம் அணி மேலும் 1 கோல் மட்டுமே அடிக்க முடிந்தது. போட்டி நிறைவுபெறும் நேரத்தில் அர்ஜெண்டினா அணி மேலும் ஒரு கோல் அடித்து அசத்த 4 - 2 என்ற கோல் கணக்கில் வெற்றி பெற்று தங்கப்பதக்கத்தை வென்று வரலாற்றில் இடம்பெற்றது.

இதுவரை இறுதிப்போட்டிக்கு கூட தகுதி பெறாமல் இருந்த அர்ஜெண்டினா அணி, முதல் முறையாக இறுதியில் நுழைந்து தங்கப்பதக்கத்தை வென்றிருப்பது குறிப்பிடத்தக்கது.