மீண்டும் சொதப்பிய டூட்டி சந்த்... ஒலிம்பிக் கனவு தகர்ந்தது!

100 மீட்டர் ஓட்டப் போட்டியில் தேசிய சாதனைக்குச் சொந்தக்காரர் ஒடிசா மாநிலத்தைச் சேர்ந்த டூட்டி சந்த். 4 அடி 11 அங்குலம் மட்டுமே இருக்கும் இவர் இந்தியாவின் மின்னல் வேக வீராங்கனை என்று அழைக்கப்படுகிறார். பெண்களுக்கான 100 மீட்டர் ஓட்டப் போட்டியில் சர்வதேச அளவில் தங்கப் பதக்கம் வென்ற முதல் இந்தியர் இவர்தான். பி.டி.உஷாவை விட மிக வேகமாக ஓடக்கூடிய இவர் மீது இந்த ஒலிம்பிக் போட்டியில் அதிக நம்பிக்கை இருந்தது. 2016 ரியோ ஒலிம்பிக் போட்டியிலும் இவரால் இறுதிப் போட்டிக்கு முன்னேற முடியவில்லை.

இந்நிலையில் தற்போது ஜப்பான் தலைநகரம் டோக்கியோவில் நடைபெற்றுவரும் ஒலிம்பிக் தொடரில் இந்தியா சார்பாக 100 மீட்டர், 200 மீட்டர் என இரு பிரிவுகளிலும் தகுதிபெற்றிருந்தார். கொரோனா பிரச்சினைகளால் அதிக தொடர்களில் விளையாட முடியாத சூழலில், ஒலிம்பிக் தகுதிக்கான இலக்கை அடையாவிட்டாலும் தரவரிசை அடிப்படையில் ஒலிம்பிக் போட்டிக்கு நேரடியாகத் தகுதிபெற்றார் டூட்டி சந்த்.

100 மீட்டர் ஓட்டத்தில் 11.54 நொடிகளில் பந்தய தூரத்தைக் கடந்ததால் அவருக்கு அந்த ஹீட்டில் ஏழாவது இடமே கிடைத்தது. மொத்தம் பங்கேற்ற 54 வீராங்கனைகளில் இவருக்குக் கிடைத்தது 45ஆவது இடம். இதனால் இவர் அரையிறுதிக்குத் தகுதிபெறமுடியவில்லை. 100 மீட்டர் ஓட்டத்தில் 11.17 நொடிகளில் கடந்த சாதனை இருந்தாலும் ஒலிம்பிக் போட்டியில் இவரால் சிறப்பாகச் செயல்பட முடியவில்லை.

ஒலிம்பிக் ஹாக்கி: ‘வெண்கல பதக்கத்திற்கான போட்டி’ இந்தியா யாருடன் மோதப் போகுதுனு தெரியுமா?
நேற்று நடைபெற்ற 200 மீட்டர் ஓட்டத்திலும் பந்தய தூரத்தை 23.85 நொடிகளில் கடந்து அந்த ஹீட்டில் ஏழாவது இடத்தைப் பிடித்தார். இந்த சீசனில் இவரது சிறப்பான ஓட்டம் இது என்றாலும் மற்ற வீராங்கனைகளுடன் ஒப்பிடும்போது இவருக்கு கடைசி இடமே கிடைத்தது. இதனால் இந்தப் போட்டியிலும் இவரால் அரையிறுதிக்குத் தகுதிபெறமுடியவில்லை. இவர் அதிகபட்சமாக 23 நொடிகளில் கடந்த சாதனையைத் தன்வசம் வைத்திருந்தாலும் ஒலிம்பிக் போட்டியில் அவரால் அத்திறனை வெளிப்படுத்த முடியவில்லை.

Tokyo Olympic: பைனல் கனவு தகர்ந்தது…அரையிறுதியில் ஆடவர் ஹாக்கி அணி தோல்வி!
இதனால் மிகவும் எதிர்பார்க்கப்பட்ட டூட்டி சந்த் வெறும் கையோடு இந்தியா திரும்புகிறார். பதக்கம் வெல்ல முடியவில்லை என்றாலும் தனது அதிகபட்ச திறனை ஒலிம்பிக் போட்டியில் வெளிப்படுத்தி கடைசி இடத்தைப் பெற்றாலும் அது திருப்திகரமானதாக இருக்கும். ஆனால் இந்தியாவிலும் மற்ற தொடர்களிலும் பல பதக்கங்களைக் குவித்த டூட்டி சந்த் ஒலிம்பிக் தொடரில் கடைசி இடத்தைப் பிடிப்பது ரசிகர்கள் மத்தியில் அதிருப்தியையும் ஏமாற்றத்தையும் வெளிப்படுத்தியுள்ளது.