ஒலிம்பிக்கிற்கான அதிரடி சிறப்புக் குழு: டிஆர்எஸ் கவிதா வரவேற்பு

''நாட்டில் விளையாட்டை வளர்க்க வேண்டும் என்பதில் எங்களுக்கு மாற்று கருத்து இல்லை. பிரதமர் மோடியின் அதிரடி சிறப்புக் குழு திட்டத்தை வரவேற்கிறோம்'' என்று தெலங்கானா ராஷ்டிரிய சமிதி தலைவர் கவிதா தெரிவித்துள்ளார்.

நாட்டில் விளையாட்டு வீரர்களை ஊக்குவித்து, ஒலிம்பிக்கில் அதிக பதக்கங்களை பெற வைக்க வேண்டும் என்று பிரதமர் மோடி தனது விருப்பத்தை சமீபத்தில் தெரிவித்து இருந்தார். அதற்காக அடுத்த மூன்று ஒலிம்பிக் தொடர்களுக்கான திட்டங்களை தயாரிக்க அதிரடி சிறப்புக்குழுவை அமைக்க இருப்பதாக பிரதமர் நரேந்திர மோடி அறிவித்து இருந்தார்.

டெல்லில் வெள்ளிக்கிழமை இரவு நடைபெற்ற அமைச்சரவைக் கூட்டத்தில் பிரதமர் மோடி இந்த அறிவிப்பை வெளியிட்டார். அதன் படி, 2020, 2024 மற்றும் 2028ஆம் ஆண்டுகளில் நடைபெறும் மூன்று ஒலிம்பிக் தொடர்களுக்கான இந்தியாவின் சிறப்பு அதிரடி திட்டங்களை மேற்கொள்ள சிறப்புக்குழு அடுத்த சில நாட்களில் அமைக்கப்படவுள்ளதாக பிரதமர் மோடி அறிவித்தார்.

மேலும், சிறப்புக்குழுவில் விளையாட்டுத்துறை வல்லுநர்களுடன் பிற துறைகளைச் சார்ந்த வல்லுநர்களும் இடம்பெறுவார்கள். விளையாட்டுகளுக்கு ஏற்ற கட்டமைப்பு வசதிகளை உருவாக்குதல், வீரர் வீராங்கனைகளுக்கு பயிற்சியளித்தல் மற்றும் ஒலிம்பிக்கில் பங்கேற்பதற்கான வீரர் வீராங்கனைகள் தேர்வு உள்ளிட்டவை தொடர்பான செயல் திட்டங்களை இந்த சிறப்புக்குழு நிர்ணயம் செய்யும். அடிக்கடி நிகழும் தவறுகள் மற்றும் அக்கறையின்மை குறித்த புகார்களுக்கு அந்தந்த விளையாட்டுகளுக்கு பொறுப்பேற்றுள்ள அதிகாரிகள் பதிலளிக்க வேண்டியது கட்டயமாக்கப்படும் என்றும் பிரதமர் மோடி குறிப்பிட்டு இருந்தார்.

இந்த சிறப்பு திட்டங்களை வரவேற்பதாக தெலங்கானா ராஷ்டிரிய சமிதி தலைவர் கவிதா தெரிவித்துள்ளார்.