Hockey World Cup 2018: கோலாகலமாக தொடங்கிய உலகக் கோப்பை ஹாக்கி தொடரின் தொடக்கவிழா!

ஆண்களுக்கான 14வது உலகக் கோப்பை ஹாக்கி தொடரின் தொடக்க விழா உடன் இன்று கோலாகலமாக தொடங்கியுள்ளது.

இந்தியாவின் புவனேஷ்வரில், ஆண்களுக்கான உலகக்கோப்பை ஹாக்கி தொடர் வரும் நவம்பர் 28 முதல் டிசம்பர் 16 வரை நடக்கவுள்ளது. இதில் 16 அணிகள் பங்கேற்கவுள்ளன. 19 நாட்கள் நடக்கும் உலகக்கோப்பையில், பங்கேற்கும் அணிகள் 4 பிரிவுகளாக பிரிக்கப்பட்டு, ஒவ்வொரு பிரிவிலும் 4 அணிகள் இடம் பெற்றுள்ளனர்.

ஹாக்கி தரவரிசையில் 5வது இடத்தில் உள்ள இந்திய அணி, ‘சி பிரிவில் ரியோ ஒலிம்பிக்கில் 2வது இடம் பிடித்த பெல்ஜியம், கனடா, தென் ஆப்ரிக்கா அணிகளுடன் இடம் பெற்றுள்ளது. இதில் ஒவ்வொரு பிரிவிலும் முதல் இடம் பிடிக்கும் அணிகள் நேரடியாக காலிறுதிக்கு தகுதி பெறும், இரண்டாவது, மூன்றாவது இடம் பிரிக்கும் அணிகள் குறுக்கு போட்டிகளில் பங்கேற்று கடைசி எட்டு அணிகளில் இடம் பிடிக்கும். கடைசி இடம் பிடிக்கும் அணிகள் தொடரில் இருந்து வெளியேறும்.

Also Read This: Hockey World Cup anthem: ஹாக்கி உலகக்கோப்பை அதிகாரப்பூர்வ பாடலை வெளியிட்ட ஒடிசா முதல்வர்!




உலகக்கோப்பை ஹாக்கி தொடரில் இந்திய அணி மொத்தமாக 13 முறை பங்கேற்றுள்ளது. இதில் 1975ல் சாம்பியன் பட்டம் வென்றது. இந்நிலையில் சுமார் 43 ஆண்டுகளாக இந்திய அணி உலகக்கோப்பை தொடரின் வரலாற்றில் அரையிறுதிக்கு தகுதி பெறவில்லை. இந்நிலையில் இந்த ஆண்டு இத்தொடர் இந்தியாவில் நடப்பதால், இந்த ஏக்கத்தை போக்கும் என இந்திய ரசிகர்கள் எதிர்பார்க்கின்றனர்.

இந்நிலையில் இத்தொடருக்கான அதிகாரப்பூர்வ பாடலை ஒடிசா முதல்வர் நவீன் பட்நாயக் வெளியிட்டார். இந்த பாடலுக்கு ஆஸ்கர் விருது வென்ற ஏ.ஆர்.ரஹ்மான் இசையமைத்துள்ளார். இதன் வீடியோ வடிவில், பாலிவுட் பாட்ஷா ஷாருக் கான், லேடி சூப்பர் ஸ்டார் நயன்தாரா ஆகியோர் நடனமாடியுள்ளனர். உலகக்கோப்பை ஹாக்கி தொடருக்கான தொடக்க விழா இன்று ஒடிஷா மாநிலம் புவனேஷ்வரில் உள்ள காலிங்கா மைதானத்தில் கோலாகலமாக தொடங்கியுள்ளது.

தொடக்க விழாவை முன்னிட்டு அனைத்து அரசு அலுவலகங்கள் மற்றும் கல்வி அலுவலகங்கள் ஆகியவற்றிற்கு இன்று விடுமுறை அறிவிக்கப்பட்டுள்ளது என்பது குறிப்பிடத்தக்கது.