ரெடியா... 1...2...3... ஜோகோவிச்சுக்கு தலையால் முட்டி கோல் அடிப்பது எப்படி என பயிற்சியளித்த ரொனால்டோ!

சர்வதேச கால்பந்து அரங்கில் சிறந்த வீரர்களில் ஒருவராக உள்ளவர் போர்சுகலின் கால்பந்து வீரர் கிறிஸ்டியானோ ரொனால்டோ. கடந்த 10 ஆண்டுகளாக ரொனால்டோவும், அர்ஜெண்டினாவின் நட்சத்திர கால்பந்து வீரர் மெஸ்சியும் ஆண்டு வருகிறார்கள். இந்நிலையில் சமீபத்தில் சுமார் 2.5 மீ உயரம் தாவி ரொனால்டோ அடித்த கோல் ஒன்று ஒண்டர் கோல் என சமூக வலைதளத்தில் வைரலானது.

விடுமுறைக் கொண்டாட்டம்
கிறிஸ்துமஸ் பண்டிகை உலகம் முழுதும் கோலாகலமாக கொண்டாடப்பட்டது. தற்போது விடுமுறை நாட்கள் என்பதால் ஓய்வு நாட்களில் கிறிஸ்யானோ ரொனால்டோ ஜிம்மில் உடற்பயிற்சியில் ஈடுபட்டு வருகிறார். இதற்கிடையில் இவருடன் ஜிம்மில் செர்பியாவின் நட்சத்திர டென்னிஸ் வீரரான நோவாக் ஜோகோவிச்சும் பயிற்சியில் ஈடுபட்டுள்ளார்.

கோல் பயிற்சி
இவர்கள் உடற்பயிற்சியில் ஈடுபட்ட போது வேடிக்கையாக ரொனால்டோ, ஜோகோவிச்சுக்கு தலையால் முட்டி கோல் அடிப்பது எப்படி என பயிற்சி அளித்துள்ளார். அந்த பயிற்சியை வீடியோவாக எடுத்து தனது இன்ஸ்டாகிராம் பக்கத்தில் வெளியிட்டுள்ளார்.

இதுதொடர்பாக ரொனால்டோ வெளியிட்ட ட்விட்டர் பதிவில், “ஜோகோவிச்சுக்கு தவ்வுவது எப்படி என பயிற்சி அளித்தேன். உன்னைப் பார்த்ததிலும், பயிற்சி அளித்ததிலும் மகிழ்ச்சி.” என அதில் குறிப்பிட்டுள்ளார்.


கூட்டணி தாவல்
ரொனால்டோ பயிற்சி அளித்த பின் தொடர்ந்து இருவரும் சேர்ந்து ஜிம்மில் இருந்த கயிறை தலையால் தட்ட முயற்சி செய்தனர். இதில் முதல் முயற்சியில் ஜோகோவிச் கோட்டை விட இரண்டாவது முறையில் ரொனால்டோவுக்கு இணையாக அசத்தினார். இதற்கிடையில் ரொனால்டோவின் ஜூவாண்டஸ் அணி வரும் ஜனவரி மாதம் 6ஆம் தேதி காக்லியாரி அணியை எதிர்கொள்கிறது.

16 பட்டங்கள்
மறுபுறம் ஜோகோவிச் வரும் ஜனவரி 20ஆம் தேதி துவங்கவுள்ள கிராண்ட்ஸ்லாம் டென்னிஸ் தொடரான ஆஸ்திரேலிய ஓபன் டென்னிஸ் தொடருக்கு தயாராகி வருகிறார். கடந்த 10 ஆண்டுகளில் ஜோகோவிச் 16 முக்கிய பட்டங்களை வென்று அசத்தியுள்ளார்.