ஏற்கனவே தோல்வி...
கத்தாரில் வரும் 2022ல் உலகக்கோப்பை கால்பந்து தொடர் நடக்கிறது. இதன் தகுதிச்சுற்று போட்டிகள் உலகின் பல்வேறு பகுதிகளில் நடக்கிறது. இதன் ‘இ’ பிரிவில் கத்தா, ஓமன், ஆப்கானிஸ்தான், இந்தியா, வங்கதேச அணிகள் இடம் பெற்றுள்ளன.
இந்தியாவின் கவுகாத்தியில் நடந்த உலகக்கோப்பை தகுதிச்சுற்றுப் போட்டிக்கான முதல் சுற்றில் இந்திய அணி ஓமனிடம் 2-1 என்ற கோல் கணக்கில் தோல்வியடைந்தது. இந்நிலையில் மஸ்கட்டில் நடந்த இரண்டாவது சுற்று போட்டியில் இந்திய அணி, ஓமனை எதிர்கொண்டது.
மாசின் அபாரம்
இப்போட்டியில் துவக்கம் முதல் ஆதிக்கம் செலுத்திய ஓமன் அணிக்கு, போட்டியின் 33வது நிமிடத்தில் மாசின் அல் காஷானி முதல் கோல் அடித்தார். இதையடுத்து முதல் பாதியின் முடிவில் இந்திய அணி வீரர்களால் இதற்கு பதிலடி கொடுக்க முடியவில்லை.
கோல் இல்லை
பரபரப்பாக துவங்கிய இரண்டாவது பாதியிலும் ஓமன் அணி வீரர்களே ஆதிக்கம் செலுத்தினர். இதில் போட்டியின் 64வது நிமிடத்தில் கிடைத்த ஃபிரி கிக் வாய்ப்பை ஓமன் வீரர் அல் காதி அடிக்க, அதை இந்திய கோல்கீப்பர் குர்கீரத் அருமையாக தடுத்தார். இதையடுத்து இரண்டாவது பாதியில் இரு அணி வீரர்களாலும் கோல் எதுவும் அடிக்க முடியவில்லை. இறுதியியில் இந்திய அணி 0-1 என்ற கோல் கணக்கில் ஓமனிடம் வீழ்ந்தது.
வெறும் 3 புள்ளிகள்
உலகக்கோப்பை தகுதிச்சுற்றுக்கான ‘இ’ பிரிவு புள்ளிப்பட்டியலில் இந்திய அணி வெறும் 3 புள்ளிகளுடன் 4வது இடத்தில் உள்ளது. இந்திய அணி பங்கேற்ற 5 போட்டியில் 3 டிரா, 2 தோல்வி என 3 புள்ளிகள் மட்டுமே இந்திய அணி பெற்றுள்ளது.
கிட்டத்தட்ட அவுட்
இதனால் கத்தாரில் 2022இல் நடக்கவுள்ள உலகக்கோப்பை கால்பந்து தொடருக்கு இந்திய அணி தகுதி பெறும் கனவு கிட்டத்தட்ட கலைந்தது எனலாம். இரண்டாவது இடத்தில் உள்ள ஓமனுக்கும் இந்திய அணிக்கு இடையே 9 புள்ளிகள் வித்தியாசம் உள்ளது. இன்னும் வெறும் 3 போட்டிகள் மட்டுமே எஞ்சியுள்ள நிலையில், 3 போட்டியிலும் இந்திய அணி வென்றாலும், இந்திய அணி மூன்றாவது சுற்றுக்கு செல்லும் வாய்ப்பு குறைவு தான்.
ஆசிய கோப்பை வாய்ப்பு
ஆனால் 2023ல் நடக்கவுள்ள ஆசிய கோப்பை தகுதிச்சுற்றின் மூன்றாவது சுற்றுக்கு முன்னேறும் வாய்ப்பு இந்திய அணிக்கு உள்ளது. இந்த உலகக்கோப்பை தகுதிச்சுற்று போட்டிகளின் முடிவில் 8 பிரிவுகளிலும் 3வது மற்றும் 4வது இடம் பிடிக்கும் அணிகள் ஆசிய கோப்பை தகுதிச்சுற்றின் மூன்றாவது சுற்றுக்கு நேரடியாக தகுதிபெறும்.
அடுத்த போட்டிகள் எப்போது?
இந்திய அணியின் அடுத்த மூன்று போட்டிகளும், அடுத்த ஆண்டில் நடக்கவுள்ளது. மார்ச் 26, 2020இல் கத்தாருக்கு எதிராக இந்தியாவிலும், ஜூன் 4, 2020இல் வங்கதேசத்துக்கு எதிராகவும், ஜூன் 9, 2020 ஆப்கானிஸ்தானுக்கு எதிராக இந்தியாவிலும் நடக்கவுள்ளது.