யூத் ஒலிம்பிக்ஸ்: துப்பாக்கிச் சுடுதலில் இந்தியாவிற்கு முதல் தங்கப் பதக்கம் பெற்றுத் தந்த மனு பாகர்!

அர்ஜெண்டினாவின் பியோனஸ் ஏர்ஸில் யூத் ஒலிம்பிக்ஸ் தொடர் கடந்த 6ஆம் தொடங்கி நடைபெற்று வருகிறது. இதில் இந்தியாவின் சார்பில் பங்கேற்ற 16 வயதான மனு பாகர், 10 மீ ஏர் பிஸ்டல் துப்பாக்கிச் சுடுதல் போட்டியில் தங்கப் பதக்கம் வென்றார். இதுவே இப்பிரிவில் இந்தியாவிற்கு கிடைக்கும் முதல் தங்கம் என்பது குறிப்பிடத்தக்கது.

அவர் 236.5 புள்ளிகள் பெற்று, பட்டியலில் முதலிடம் பெற்றார். இதையடுத்து 235.9 புள்ளிகள் பெற்ற ரஷ்யாவின் இயானா இனினா வெள்ளிப் பதக்கமும், நினோ குட்சிபெர்ட்ஸே வெண்கலப் பதக்கமும் வென்றனர்.

முன்னதாக இந்தோனேசியாவில் நடைபெற்ற ஆசிய விளையாட்டுப் போட்டிகள், உலக சாம்பியன்ஷிப் போட்டி ஆகியவற்றில் ஏற்பட்ட தோல்விகளுக்கு கடின உழைப்பு நல்ல பலன் தந்துள்ளது. இதுகுறித்து மனு பாக்கர் கூறுகையில், இது எனக்கு முக்கியத்துவம் வாய்ந்த வெற்றி ஆகும்.

ஆசிய விளையாட்டுப் போட்டியில் ஏற்பட்ட தோல்வி நல்ல பாடம் கற்றுத் தந்தது. அதன் பிறகான கடின உழைப்பிற்கு சிறந்த பலன் கிடைத்துள்ளது. நம் நாட்டிற்கு மேலும் பல பதக்கங்களைப் பெற்றுத் தருவேன்.

எப்போதும் என்னுடைய சிறந்த செயல்பாட்டை வெளிப்படுத்த முயற்சிப்பேன். சில நேரங்களில் வெற்றிக் கிடைப்பதில்லை. ஆனால் தற்போது நன்றாக விளையாடி அதிகப் புள்ளிகள் பெற்றது மகிழ்ச்சி அளிக்கிறது என்றார்.

Manu Bhaker claims India's first ever gold in shooting at Youth Olympics.