கால்பந்து உலகம் எதிர்பார்த்த செய்தி: ஃபெனெர்பாசேவில் இணைந்தார் ஓசில்!

2014ஆம் ஆண்டு உலக கோப்பை வென்ற மேசுட் ஓசில், ஆர்சனல் அணிக்காக கடந்த எட்டு ஆண்டுகள் விளையாடி இன்று துருக்கி நாட்டைச் சேர்ந்த ஃபெனெர்பாசே அணியில் தன்னை இணைத்துள்ளார். நடுகள தாக்குதல் வீரரான இவர் பல்வேறு உலகத்தரம் வாய்ந்த ஸ்ட்ரைக்கர்களுக்கு கோல் குவிக்க உதவியுள்ளார். குறிப்பாக ரொனால்டோ, பென்சிமா, கிலோஸ், முல்லர் போன்றோர் கோல் அடிப்பதற்கு பெரிதும் உதவியுள்ளார்.

கடந்த 8 ஆண்டுகளாக ஆர்சனல் அணிக்கு பல்வேறு சமயங்களில் உதவி செய்து வந்தார், ஆர்சனல் அணியின் முன்னாள் மேலாளரான வெங்கர் இருக்கும் வரை அணியின் மிக முக்கியமான வீரராக திகழ்ந்தார். அவரது காலத்திற்குப் பின் வந்த உனாய் எமரி மற்றும் தற்போதைய மேலாளரான அர்டேட்டா ஆகியோர் அவர் மீது சரியான நம்பிக்கை இல்லாத காரணத்தால் அவரை பல ஆட்டங்களில் சப்ஸ்டிடியுடாக பயன்படுத்தினார்கள். மட்டுமல்லாமல் இந்த ஆண்டிற்கான 28 பேர் கொண்ட பிரதான அணியில் இவரது பெயர் இடம் பெறவில்லை.

இதன் காரணமாக விரைவில் வெளியேறுவார் என்று எதிர்பார்க்கப்பட்டது, மேலும் அணிக்காக கொஞ்சம் கூட விளையாடாமல் இவர் அதிகம் சம்பளம் வாங்குகிறார் என்று பலர் விமர்சித்து வந்தனர். இதற்கிடையில் ஆர்சனல் அணியின் சின்னமான (Mascot) கன்னராசோரஸ் என்ற டைனோசார் நிதி தட்டுப்பாடு காரணமாக நிறுத்தி வைக்கப்பட்டது.

சூடுபிடிக்கும் பிரீமியர் லீக் கோப்பைக்கான பந்தயம்: மான்செஸ்டர் சிட்டி அபார வெற்றி

இந்த பிரச்சனையை தன் கைகளில் எடுத்த ஓசில் தான் ஆர்சனல் அணிக்கு விளையாடும் வரை அதற்குத் தேவையான பணத்தை தான் தன்னுடைய சம்பளத்திலிருந்து கொடுப்பதாக உறுதி கூறினார். அவர் அதிகம் சம்பளம் வாங்குகிறார் என்று விமர்சித்தவர்கள் வாயை இந்த செயல் மூட வைத்தது. இப்பொழுது அவர் ஃபெனெர்பாசேவில் சென்றதைத் தொடர்ந்து கன்னராசோரஸ்ஸின் நிலைமை என்ன என்பதை பொறுத்திருந்து தான் பார்க்க முடியும்.

மேசுட் ஓசில்லின் ஃபெனெர்பாசே வருகையைத் தொடர்ந்து ஃபெனெர்பாசே ரசிகர்கள் இதை கொண்டாடி வருகின்றனர். மேசுட் ஓசில் தனது சிறு வயதில் இருந்தே ஃபெனெர்பாசே அணிக்கு சப்போர்ட் செய்தவர் என்பது குறிப்பிடத்தக்கது.