ஒலிம்பிக் தினம்: கொண்டாட்டத்தை இல்லாமலாக்கிய கொரோனா!

ஒலிம்பிக் போட்டிகள் இரண்டு ஆண்டுகளுக்கு ஒரு முறை கோடை காலத்திலும், குளிர் காலத்திலும் மாற்றி மாற்றி நடத்தப்படுகின்றன. மாற்றுத் திறனாளிகளுக்கான ஒலிம்பிக் விளையாட்டுக்கள், பதின்ம வயதினருக்கான இளையோர் ஒலிம்பிக் விளையாட்டுக்களும் தற்போது நடத்தப்பட்டு வருகின்றன. 1916, 1940, 1944 ஆகிய ஆண்டுகளில் நடைபெற வேண்டிய ஒலிம்பிக் போட்டிகள் உலகப் போரினால் நடைபெறவில்லை. பனிப்போர்க் காலத்தில் பல நாடுகள் இப்போட்டியைப் புறக்கணித்ததால், 1980, 1984 ஆண்டுகளில் குறைந்த அளவிலான நாடுகளின் பங்கேற்புடனேயே நடைபெற்றன.

அதன்பிறகு தற்போது வருகிற ஆகஸ்ட் மாதம் ஜப்பான் தலைநகர் டோக்கியோவில் நடைபெறவிருந்த ஒலிம்பிக் போட்டிகள் கொரோனா பெருந்தொற்றால் ரத்து செய்யப்பட்டுள்ளன. ஒலிம்பிக் போட்டிகள் ஒவ்வொரு முறையும் ஒவ்வொரு நாடுகளில் நடைபெற்றாலும் ஜுன் 23ஆம் தேதி ஒலிம்பிக் தினம் உலகளவில் கொண்டாடப்படுகிறது. பிரான்ஸ் நாட்டைச் சேர்ந்த கல்வியாளரும் வரலாற்று ஆர்வலருமான பியரி டி கூபர்டின், சர்வதேச ஒலிம்பிக் கமிட்டியை நிறுவிய நாளே தற்போது உலக ஒலிம்பிக் தினமாகக் கொண்டாடப்பட்டு வருகிறது. 1948 இல் தான் முதலாவது ஒலிம்பிக் தினம் கடைப்பிடிக்கப்பட்டது.

ஒலிம்பிக் போட்டி பற்றி இளைஞர்களிடம் விழிப்புனர்வு உண்டாக்குவதே இதன் நோக்கம். விளையாட்டு மட்டுமல்லாது இசை, நடனம் இணைந்த கலாசார திருவிழாவாகவும் ஒலிம்பிக் தினம் அமைந்துள்ளது. இதில் பங்கேற்கும் நட்சத்திர வீரர், வீராங்கனைகள் சிறுவர், சிறுமியரை சந்தித்து தங்கள் அனுபவங்களை பகிர்ந்துகொள்வதுடன் ஆலோசனைகளையும் வழங்குவர். ஒலிம்பிக் போட்டிகள் தடை பட்டது போல் இந்த ஆண்டு ஒலிம்பிக் தின கொண்டாட்டமும் தடைபட்டுள்ளது.