தங்கமங்கைக்கு ரூ.1 லட்சம் வழங்கி கௌரவித்த ரோபோ சங்கருக்கு குவியும் வாழ்த்துகள்!

23வது ஆசிய தடகளப் போட்டிகள் கத்தார் நாட்டின் தோஹா நகரில் நடைபெற்றது. இதில் 800 மீ தடகளப் போட்டியில் கலந்து கொண்ட திருச்சியைச் சேர்ந்த வீராங்கனை கோமதி மாரிமுத்து தங்கப் பதக்கம் வென்றார்.

அவருக்கு நாடு முழுவதும் பாராட்டுகள் குவிந்து வருகின்றன. மிகவும் ஏழ்மையான குடும்பத்தைச் சேர்ந்த கோமதியின் சாதனையை, பல்வேறு தரப்பினரும் ஊக்குவித்து வருகின்றனர்.

கத்தாரில் இருந்து சென்னை திரும்பிய கோமதிக்கு, விமான நிலையத்தில் உற்சாக வரவேற்பு அளிக்கப்பட்டது. அப்போது பேசிய அவர், ஒலிம்பிக்கில் தங்கம் வெல்வேன். எனக்கு பின்னால் வரும் திறமையான பெண்கள், ஆண்களுக்கு உதவிகள் கிடைக்க வேண்டும்.

அவர்கள் மேலே வர வேண்டும் என்று கூறினார். இந்நிலையில் நடிகர் ரோபோ சங்கர், கோமதி மாரிமுத்துவிற்கு ரூ.1 லட்சம் நிதியுதவி அளித்து கௌரவித்துள்ளார். இதையடுத்து ரோபோ சங்கருக்கு பலரும் பாராட்டு தெரிவித்துள்ளனர்.

தங்கமங்கை போன்று இளைய தலைமுறையினரை ஊக்குவிக்கும் செயலுக்கு பல்வேறு தரப்பினரும் வாழ்த்து தெரிவித்து வருகின்றனர்.