தாய் இறந்த 3 நாட்களில் பிரபல நடிகர் இர்ஃபான் கான் மரணம்

பிரபல பாலிவுட் நடிகர் இர்ஃபான் கானுக்கு புற்றுநோய் இருப்பது கடந்த 2018ம் ஆண்டு கண்டுபிடிக்கப்பட்டது. இதையடுத்து அவர் லண்டனில் சிகிச்சை பெற்று வந்தார்.

ஊரடங்கு உத்தரவால் மும்பையில் இருந்த இர்ஃபான் கானின் உடல்நலம் நேற்று திடீரென்று மோசமானது. இதையடுத்து மும்பையில் உள்ள கோகிலாபென் திருபாய் அம்பானி மருத்துவமனையில் தீவிர சிகிச்சை பிரிவில் இர்ஃபான் கான் அனுமதிக்கப்பட்டார்.

இந்நிலையில் சிகிச்சை பலனின்றி இர்ஃபான் இன்று உயிர் இழந்தார். அவருக்கு வயது 54. பல மாதங்களாக தைரியமாக புற்றுநோயுடன் போராடி வந்த இர்ஃபான் மறைந்த செய்தி அறிந்த திரையுலக பிரபலங்களும், ரசிகர்களும் அதிர்ச்சி அடைந்துள்ளனர்.

இர்ஃபான் கானின் ஆத்மா சாந்தியடைய பிரார்த்தனை செய்வதாக தெரிவித்துள்ளனர். முன்னதாக இர்ஃபான் கானின் அம்மா சயீதா பேகம் கடந்த 3 நாட்களுக்கு முன்பு உடல்நலக்குறைவால் ஜெய்பூரில் காலமானார்.

அவரின் முகத்தை கடைசியாக நேரில் பார்க்க முடியாமல் வீடியோ கால் மூலம் பார்த்து அழுதார் இர்ஃபான். தாய் இறந்த 3 நாட்களில் மகனும் இறந்துள்ளது ரசிகர்களை கவலை அடையச் செய்திருக்கிறது.

புற்றுநோய்க்காக சிகிச்சை பெற்றபோது இர்ஃபான் நடித்த அங்ரேஜி மீடியம் படம் வெளியாகி நல்ல வரவேற்பை பெற்றது என்பது குறிப்பிடத்தக்கது.