Wedding:முன்னாள் காதலி/காதலரின் திருமணத்தில் கலந்து கொண்ட நடிகர்கள், நடிகைகள்

காதல் முறிந்தால் ஆளுக்கொரு பக்கம் செல்வது எல்லாம் அந்த காலம். தற்போது எல்லாம் காதல் முறிந்துவிட்டாலும் மனக்கசப்பை மனதில் வைத்துக் கொள்ளாமல் நட்பாக பழகுகிறார்கள். பாலிவுட்டில் அந்த டிரெண்ட் அதிகம் உள்ளது. அப்படி ஒரு காலத்தில் தங்களுடன் காதலில் இருந்தவர்களின் திருமணத்தில் கலந்து கொண்டவர்களை பாருங்கள்.

பாலிவுட் நடிகை பிபாஷா பாசுவும், நடிகர் தினோ மோரியாவும் கடந்த 1996ம் ஆண்டு முதல் 2002ம் ஆண்டு வரை காதலித்தார்கள். அதன் பிறகு பிரிந்துவிட்டார்கள். இருப்பினும் தொடர்ந்து நண்பர்களாக இருக்கிறார்கள். இந்நிலையில் பிபாஷா பாசு தன்னுடன் சேர்ந்து நடித்த கரண் சிங் குரோவரை காதலித்து திருமணம் செய்து கொண்டபோது நேரில் வந்து வாழ்த்தினார் தினோ மோரியா.

சஞ்சய் லீலா பன்சாலியின் சாவரியா படம் மூலம் பாலிவுட்டில் அறிமுகமானார்கள் ரன்பிர் கபூரும், சோனம் கபூரும். அப்பொழுது அவர்களுக்கு இடையே காதல் ஏற்பட்டது. மோசமாக சண்டை போட்டு பிரிந்ததாக கூறப்பட்டது. இருப்பினும் சோனம் கபூருக்கும், ஆனந்த் அஹுஜாவுக்கும் திருமணம் நடந்தபோது சந்தோஷமாக வந்து வாழ்த்தினார் ரன்பிர். அப்பொழுது தான் முதல் முறையாக ஆலியா பட்டுடன் வெளியே வந்தார் ரன்பிர் கபூர். பின்னர் ஆலியா பட்டை திருமணம் செய்து கொண்டார்.

தன்னுடன் சேர்ந்து நடித்த மிலிந்த் சோமனை நடிகை திபன்னிதா சர்மா காதலித்ததாக பேசப்பட்டது. ஆனால் அவர்கள் இருவரும் காதலை உறுதி செய்யவில்லை. அங்கிதா கொன்வரை மிலிந்த் சோமன் திருமணம் செய்து கொண்டபோது அந்த நிகழ்ச்சியில் திபன்னிதா சர்மா கலந்து கொண்டார். மணமகளுடன் சேர்ந்து செல்ஃபி எடுத்தார்.

மூத்த நடிகர் தர்மேந்திரா, நடிகை ஹேமமாலினியின் இளைய மகள் அஹானா தியோலும், ரன்வீர் சிங்கும் காதலித்ததாக முன்பு பேசப்பட்டது. ஆனால் அந்த காதல் நிலைக்கவில்லை. காதல் முறிந்தாலும் நட்பாக இருந்து வருகிறார்கள். இந்நிலையில் அஹானாவுக்கும், தொழில் அதிபர் வைபவ் வோஹ்ராவுக்கும் திருமணம் நடந்தபோது ரன்வீர் சிங் வந்து வாழ்த்தினார். அந்த நிகழ்ச்சிக்கு தீபிகா படுகோனுடன் வந்தார் ரன்வீர் சிங்.

நடிகை அனுஷ்கா சர்மாவும், ரன்வீர் சிங்கும் காதலித்தார்கள். காதல் முறிந்த பிறகு நட்பாக இருக்கிறார்கள். இந்நிலையில் ரன்வீர் சிங், தீபிகா படுகோனின் திருமண வரவேற்பு நிகழ்ச்சியில் அனுஷ்கா சர்மா கலந்து கொண்டார். அனுஷ்கா வந்தது தனக்கு ரொம்ப ஸ்பெஷல் என்று தெரிவித்தார் ரன்வீர் சிங்.

நடிகர் ஷாஹித் கபூரும், நடிகை ப்ரியங்கா சோப்ராவும் காதலித்தார்கள். ஆனால் அவர்கள் காதலை உறுதி செய்யவில்லை. கரண் ஜோஹார் தன் காஃபி வித் கரண் நிகழ்ச்சியில் கேட்டபோது கூட அவர்கள் உறுதி செய்யவில்லை. பின்னர் ப்ரியங்கா சோப்ராவுக்கும், அமெரிக்க பாடகர் நிக் ஜோனஸுக்கும் திருமணம் நடந்தபோது தன் மனைவி மீரா ராஜ்புட்டுடன் வந்து வாழ்த்தினார் ஷாஹித் கபூர்.