நான் கருப்பா, அசிங்கமா இருக்கேனா?: கலாய்த்தவர்களுக்கு சூப்பர் ஸ்டார் மகள் நெத்தியடி

பிரபல பாலிவுட் நடிகர் ஷாருக்கானின் மகள் சுஹானா இன்ஸ்டாகிராமில் அவ்வப்போது தன் புகைப்படங்களை வெளியிட்டு வருகிறார். இந்நிலையில் அவரின் நிறத்தை வைத்து பலர் கிண்டல் செய்கிறார்கள். இதை பார்த்த சுஹானா கான் தன்னை கலாய்ப்பவர்களுக்கு தக்க பதிலடி கொடுக்க முடிவு செய்தார். இதையடுத்து சுஹானா தன் புகைப்படம் ஒன்றை இன்ஸ்டாகிராமில் போஸ்ட் செய்து, தன்னை நிறத்தின் அடிப்படையில் மோசமாக விளாசி வந்த கமெண்ட்டுகளையும் வெளியிட்டுள்ளார். மேலும் தன்னை கலாய்ப்பவர்களுக்கு சரியான பதிலும் கொடுத்துள்ளார்.

இன்ஸ்டாகிராம் போஸ்ட்டில் சுஹானா கான் கூறியிருப்பதாவது, இந்தி பேசாதவர்களுக்கு ஒரு விஷயத்தை சொல்லிக் கொள்ள விரும்புகிறேன். கருப்பு நிறத்தை இந்தியில் காலா என்பார்கள். அதே கருப்பான பெண்ணை குறிக்க காலி என்பார்கள். என்னை பற்றி வந்த சில கமெண்ட்டுகள் இதோ, அவள் அழகே இல்லை. எப்பொழுது சிவப்பானார்?. அவர் நல்ல கருப்பாச்சே. கருப்பு சூனியக்காரி. அவர் சர்ஜரி மூலம் சிவப்பாகியுள்ளார். ஆனால் இன்னும் ஆண் போன்று தான் தெரிகிறார். அவர் மிகவும் அசிங்கமாகவம், கருப்பாகவும் இருக்கிறார் என்று கமெண்ட் வந்தது. தற்போது நிறைய விஷயம் நடந்து கொண்டிருக்கிறது. அதில் சரி செய்ய வேண்டிய விஷயங்களில் இதுவும் ஒன்று. இது என்னைப் பற்றி மட்டும் அல்ல. இது எந்த ஒரு காரணமும் இல்லாமல் தன்னை பற்றி குறைவாக நினைக்கும் ஒவ்வொரு இளம் பெண் அல்லது வாலிபர் பற்றியது என்கிறார்.

நான் கருப்பாக இருப்பதால் அசிங்கமாக இருக்கிறேன் என்று எனக்கு 12 வயதில் இருந்தே ஆண்களும், பெண்களும் தெரிவித்துள்ளனர். இப்படி சொன்னவர்கள் எல்லாம் பெரியவர்கள். நாம் அனைவரும் இந்தியர்கள். அதனால் நாம் மாநிறமாகத் தான் இருப்போம். சக இந்தியர்களையே வெறுப்பது உங்களின் குணத்தை காட்டுகிறது. நீங்கள் 5.7 அடி உயரமாகவும், சிவப்பாகவும் இல்லை என்றால் அழகில்லை என்று சமூக வலைதளங்களோ, உங்கள் குடும்பத்தாரோ உங்களை நம்ப வைத்தால் சாரி. நான் 5.3 அடி உயரம், மாநிறம் தான். ஆனால் அதை நினைத்து மகிழ்ச்சியாக இருக்கிறேன். நீங்கள் உங்களை பற்றி சந்தோஷப்பட வேண்டும் #endcolourism என்று தெரிவித்துள்ளார்.

சுஹானா கான் நிறம், அழகு குறித்து அளித்த விளக்கத்தை பார்த்தவர்கள் அது பற்றி ட்விட்டரில் விவாதித்துக் கொண்டிருக்கிறார்கள். இதனால் #SuhanaKhan என்கிற ஹேஷ்டேக் ட்விட்டரில் தேசிய அளவில் டிரெண்டாகிக் கொண்டிருக்கிறது. சுஹானாவுக்கு ஆதரவாக சிலரும், எதிராக சிலரும் ட்வீட் செய்துள்ளனர். ஒரு சிலரோ, சாதாரண ஆளான சுஹானாவுக்கு எப்படி இன்ஸ்டாகிராமில் ப்ளூ டிக் கிடைத்தது. ஷாருக்கான் மகள் என்பதால் இப்படி ஒரு சலுகையா, இது நியாயம் இல்லை என்று தெரிவித்துள்ளனர். ஷாருக்கான் ஆண்களுக்கான சிவப்பழகு க்ரீம் விளம்பரத்தில் நடித்த புகைப்படத்தை வெளியிட்டு முதலில் உங்கள் அப்பாவை கருப்பு நிறத்தை ஏற்றுக் கொள்ள சொல்லுங்கள் என்று சிலர் கூறியுள்ளனர்.