படம் ரிலீஸ் நேரத்தில் போய் இப்படி எனக்கு கொரோனா பாதிப்பு வந்துடுச்சே: நடிகை கவலை

கடந்த 2006ம் ஆண்டு நடந்த மிஸ் இந்தியா அழகிப் போட்டியில் கலந்து கொண்டு வெற்றி பெற்றவர் நடாஷா சுரி(31). தொலைக்காட்சி நிகழ்ச்சிகளை தொகுத்து வழங்கி வரும் நடாஷா சுரி திலீப்பின் கிங் லியர் மலையாள படம் மூலம் நடிகையானார்.

அதன் பிறகு நடாஷா பா பா பிளாக் ஷீப், வெர்ஜின் பானுப்ரியா ஆகிய இந்தி படங்களில் நடித்தார். தற்போது அவர் பிபாஷா பாசு, கரண் சிங் குரோவர் ஆகியோருடன் சேர்ந்து டேஞ்சரஸ் இந்தி படத்தில் நடித்துள்ளார்.

இந்நிலையில் நடாஷா சுரிக்கு கொரோனா வைரஸ் பாதிப்பு ஏற்பட்டுள்ளது தெரிய வந்துள்ளது. இதையடுத்து அவர் தன்னை வீட்டில் தனிமைப்படுத்திக் கொண்டுள்ளார்.

இது குறித்து நடாஷா சுரி கூறியதாவது,

நான் அனைத்து முன்னெச்சரிக்கை நடவடிக்கைகளும் எடுத்துக் கொண்டு புனேவுக்கு சென்றேன். கடந்த 3ம் தேதி திரும்பி வந்தபோது உடல்நலம் பாதிக்கப்பட்டது. எனக்கு காய்ச்சல், தொண்டை வலி ஏற்பட்டது. இதையடுத்து பரிசோதனை செய்து பார்த்தபோது எனக்கு கொரோனா பாதிப்பு இருப்பது தெரிய வந்தது.

என் குடும்பத்தாருக்கும் உடல்நலம் பாதிக்கப்பட்டது. அதனால் நான் வீட்டில் என்னை தனிமைப்படுத்திக் கொண்டு மருந்துகள் சாப்பிட்டுக் கொண்டிருக்கிறேன். என் குடும்பத்தாருக்கும் பரிசோதனை செய்யப்பட்டது. அவர்களின் பரிசோதனை முடிவுகள் இன்னும் வரவில்லை. அதற்காகத் தான் காத்திருக்கிறோம்.

டேஞ்சரஸ் படத்தை விளம்பரம் செய்ய தயாராகி வந்தோம். தற்போது என்னால் விளம்பர நிகழ்ச்சிகளில் கலந்து கொள்ள முடியாது. நாங்கள் அந்த படத்திற்காக கடினமாக உழைத்தோம். அதனால் அதை பெரிதும் எதிர்பார்க்கிறோம் என்றார்.

விக்ரம் பட் எழுதி, பூஷன் பட்டேல் இயக்கியுள்ள டேஞ்சரஸ் வரும் 14ம் தேதி எம்.எக்ஸ். பிளேயரில் வெளியாக உள்ளது. பிபாஷா பாசு தன் கணவர் கரண் சிங் குரோவருடன் சேர்ந்து நடித்திருக்கும் டேஞ்சரஸ் படத்தை பார்க்க ரசிகர்கள் ஆவலாக உள்ளனர்.

மகாராஷ்டிரா மாநிலத்தில் கொரோனா வைரஸால் பாதிக்கப்படுபவர்களின் எண்ணிக்கை நாளுக்கு நாள் அதிகரித்தபடி உள்ளது. பாலிவுட் நடிகர்கள் அமிதாப் பச்சன், அவரின் மகன் அபிஷேக் பச்சன், மருமகள் ஐஸ்வர்யா ராய், பேத்தி ஆராத்யா ஆகியோருக்கு கொரோனா வைரஸ் பாதிப்பு ஏற்பட்டு குணமடைந்தார்கள் என்பது குறிப்பிடத்தக்கது.

கொரோனாவுக்கே நாக்கு தள்ள வச்ச ஐஸ்வராய் ராய் கணவர்