எனக்கு திருமணமானது மீடியாவுக்கு தெரியாது: பிரபல நடிகை

டாப்ஸியின் பிங்க் படத்தில் அவருக்கு தோழியாக நடித்ததன் மூலம் பிரபலமானவர் கிர்தி குல்ஹாரி. மேலும் தேசிய விருதுகள் பெற்ற யுரி: தி சர்ஜிக்கல் ஸ்டிரைக் படத்தில் விமானியாக நடித்து அனைவரின் கவனத்தையும் ஈர்த்தவர் கிர்தி. கொடுத்த கதாபாத்திரமாகவே மாறிவிடுவார் கிர்தி என்று பெயர் எடுத்துள்ளார். இந்நிலையில் அவர் தனது தனிப்பட்ட வாழ்க்கை குறித்து மனம் திறந்து பேசியுள்ளார்.

பேட்டியில் கிர்தி கூறியதாவது, எனக்கு திருமணம் நடந்தது மீடியாவுக்கு சில காலம் தெரியாது. ஏனென்றால் எனக்கு திருமணமாகிவிட்டதா இல்லையா என்பதை மக்கள் அறிந்து கொள்ள ஆசைப்படும் அளவுக்கு நான் அப்பொழுது பெரிய ஸ்டார் ஒன்றும் இல்லை. பிங்க் படம் ரிலீஸான பிறகே மக்களுக்கு என்னை தெரியும். பிங்க் ரிலீஸுக்கு 3-4 மாதங்களுக்கு முன்பு தான் என் திருமணம் நடந்தது என்றார்.

என் தனிப்பட்ட வாழ்க்கை குறித்து பேசுபவள் இல்லை. அதனாலும் எனக்கு திருமணமான விஷயம் பலருக்கும் தெரியாது. தற்போது மக்கள் என்னை பற்றி தெரிந்து கொள்ள விரும்புகிறார்கள். அதனால் முடிந்த அளவுக்கு விபரங்களை ஷேர் செய்கிறேன். என் கணவர் என்னை விட பிரைவேட்டான ஆள். அதனால் அவருக்கு தனிப்பட்ட வாழ்க்கை குறித்த புகைப்படங்களை சமூக வலைதளங்களில் வெளியிடுவது பிடிக்காது.

என் கணவருடன் சேர்ந்து இருக்கும் புகைப்படங்களை வெளியிடுமாறு ரசிகர்கள் சிலர் கேட்டுக் கொண்டே இருக்கிறார்கள். ஆனால் என் கணவருடன் சேர்ந்து செல்ஃபி எடுப்பது ரொம்ப கஷ்டம். அதனால் என்னால் முடிந்த புகைப்படங்களை வெளியிடுகிறேன் என்று கிர்தி தெரிவித்துள்ளார். கிர்தி நடிப்பில் கடைசியாக வெளியான படம் மிஷன் மங்கல். அடுத்ததாக அவர் பரினீத்தி சோப்ராவின் தி கேர்ள் ஆன் தி ட்ரெய்ன் படத்தில் முக்கிய கதாபாத்திரத்தில் நடிக்கிறார்.