ராகவா லாரன்ஸின் 'லக்ஷ்மி பாம்' படம் நேரடியாக OTT-யில் ரிலீஸ்?

தற்போது நடிகை ஜோதிகாவின் பொன்மகள் வந்தாள் படம் நேரடியாக ஆன்லைனில் ரிலீஸ் ஆவதாக கூறப்படும் நிலையில், அதற்கு தியேட்டர் உரிமையாளர்கள் கடும் எதிர்ப்பு தெரிவித்து வருகின்றனர். அப்படி வெளியானால் சூர்யா தரப்பு திரைப்படங்கள் இனி எதையும் ரிலீஸ் செய்ய மாட்டோம் என தியேட்டர் உரிமையாளர் சங்க தலைவர் எச்சரித்துள்ளார்.

இந்நிலையில் தற்போது ரகவா லாரன்ஸ் ஹிந்தியில் இயக்கிவரும் லக்ஷ்மி பாம் படமும் நேரடியாக OTT யில் ரிலீஸ் ஆகிறது என தகவல் பரவி வருகிறது.

அந்த படம் மே 22ம் தேதி ரிலீஸ் என அறிவிக்கப்பட்டுள்ள நிலையில் அதனை நேரடியாக Disney+Hotstarயில் வெளியிட பேச்சுவார்த்தை நடந்து வருகிறது என கூறப்படுகிறது.

தமிழில் ஹிட் ஆன முனி 2: காஞ்சனா படத்தினை தான் ஹிந்தியில் லக்ஷ்மி பாம் என்ற பெயரில் ரீமேக் செய்துள்ளார் ராகவா லாரன்ஸ். இதில் அக்ஷய் குமார் முதல் முறையாக திருநங்கையாக நடித்துள்ளார். கியாரா அத்வானி ஹீரோயினாக நடித்துள்ளார்.

மே 22 ரிலீஸ் என அறிவிக்கப்பட்டிருந்தாலும் தற்போது கொரோனா லாக்டவுன் காரணமாக படத்தின் போஸ்ட் ப்ரோடக்ஷ்ன் பணிகள் நடைபெறவில்லை. இன்னும் எடிட்டிங் , விஎப்எக்ஸ் உள்ளிட்ட பெரிய அளவிலான பணிகள் முடியாமல் இருக்கிறது. அந்த பணிகள் முடிய ஜூன் மாதம் ஆகும் என கூறப்படுகிறது.

இந்த படத்தில் திருநங்கையின் ஆவி புகுந்த நபராக அக்ஷய் நடித்துள்ளார். அவர் சேலை கட்டி நடித்திருந்தது படத்தின் பர்ஸ்ட் லுக் போஸ்டரில் காட்டப்பட்டிருந்தது.

சேலை கட்டி நடித்தது பற்றி பேசிய அக்ஷய் குமார், "நான் சேலையில் நடிக்க எந்த பிரச்சனையையும் உணரவில்லை. எனக்கு அது சிறப்பாகவே இருந்தது. இது போன்ற வித்யாசமான விஷயங்கள் செய்ய எனக்கு பிடிக்கும். நான் நடித்ததிலேயே மிகவும் கடினமாக கதாபாத்திரம் இதுதான். அந்த கதாபாத்திரத்தை உள்வாங்கி, உடல் மொழி சரியானதாக திரையில் கொண்டு வர அதிகம் கஷ்டப்பட்டேன்" என அவர் கூறியுள்ளார்.