படத்தில் பார்க்கும் விஜய் வேறு, நிஜத்தில் அவர் வேற மாதிரி: வாரிசு நடிகை

பாலிவுட் நடிகர் சங்க்கி பாண்டேவின் மூத்த மகளான அனன்யா ஸ்டூடண்ட் ஆஃப் தி இயர் 2 படம் மூலம் பாலிவுட்டில் அறிமுகம் ஆனார். இதையடுத்து அவர் கார்த்திக் ஆர்யனுடன் சேர்ந்து பதி பத்னி அவுர் வோ படத்தில் நடித்தார். புரி ஜெகன்நாத் இயக்கத்தில் விஜய் தேவரகொண்டா நடித்து வரும் ஃபைட்டர் படம் மூலம் தெலுங்கு திரையுலகில் அறிமுகமாகிறார் அனன்யா பாண்டே.

ஃபைட்டர் படத்தின் முதல்கட்ட ஷூட்டிங் மும்பையில் நடைபெற்றது. இந்த படத்திற்காக விஜய் தேவரகொண்டா தாய்லாந்துக்கு சென்று தற்காப்பு கலை பயிற்சி எடுத்து வந்தார். ஏற்கனவே ஜிம்மில் ஒர்க்அவுட் செய்யும் விஜய் தேவரகொண்டா ஃபைட்டருக்காக கூடுதலாக ஒர்க்அவுட் செய்து வருகிறாராம்.

மும்பையில் ஷூட்டிங் நடந்தபோது எடுக்கப்பட்ட புகைப்படங்கள் வெளியாகின. இதையடுத்து விஜய் தேவரகொண்டாவும், அனன்யா பாண்டேவும் காதலிப்பதாக பேச்சு கிளம்பியது. அதை சம்பந்தப்பட்ட இருவருமே கண்டு கொள்ளவில்லை. விஜய்காரு அனன்யாவை காதலிக்கிறாரா, அப்படி என்றால் அவர் ஏற்கனவே காதலிக்கும் பெண்ணின் கதி என்னவாகும் என்று சமூக வலைதளங்களில் பேசிக் கொண்டார்கள்.
இந்நிலையில் அனன்யா பாண்டே பேட்டி ஒன்றில் விஜய் தேவரகொண்டா பற்றி பேசியுள்ளார். அந்த பேட்டியில் அனன்யா கூறியதாவது,

நான் விஜய் தேவரகொண்டாவை சந்திப்பதற்கு முன்பு அவர் நடித்த அர்ஜுன் ரெட்டி படத்தை பார்த்தேன். அந்த படத்தில் அவர் நடித்திருந்த விதம் எனக்கு மிகவும் பிடித்திருந்தது. தயாரிப்பு நிறுவன அலுவலகத்தில் தான் விஜய் தேவரகொண்டாவை முதன்முதலாக சந்தித்து பேசினேன்.

நானும் ஒரு நடிகை என்பதை சில சமயம் மறந்துவிட்டு பிற நடிகரை பார்த்தால் சந்தோஷப்படுவேன். விஜய் திரையில் இருப்பது போன்று செட்டில் இருக்க மாட்டார். நிஜத்தில் அவர் ரொம்ப அன்பானவர், அமைதியானவர், சாந்தமாக பேசுவார் என்றார்.

அனன்யா பாண்டே ஃபைட்டர் தவிர்த்து பாலிவுட் நடிகர் ஷாஹித் கபூரின் தம்பி இஷான் கட்டாருடன் சேர்ந்து காலி பீலி இந்தி படத்திலும் நடித்து வந்தார். கொரோனா வைரஸ் பிரச்சனையால் அந்த இரண்டு படங்களின் ஷூட்டிங் நிறுத்தி வைக்கப்பட்டுள்ளது.

இது தவிர அனன்யா ஷகுன் பத்ரா இயக்கத்தில் தீபிகா படுகோன், சித்தாந்த் சதுர்வேதி நடிக்கும் படத்திலும் நடிக்கவிருக்கிறார். தீபிகாவுடன் சேர்ந்து நடிக்க காத்திருப்பதாக அனன்யா தெரிவித்துள்ளார்.
விஜய் தேவரகொண்டாவை பாலிவுட்டில் அறிமுகம் செய்து வைக்க பிரபல இந்தி இயக்குநரும், தயாரிப்பாளருமான கரண் ஜோஹார் துடித்துக் கொண்டிருந்தார். என் ஊர் ஹைதராபாத், என் குடும்பம், நண்பர்கள் எல்லாம் இங்கு இருக்கும்போது நான் மட்டும் மும்பையில் தங்கி பாலிவுட் படங்களில் எப்படி நடிக்க முடியும் என்று கூறி வந்தார் விஜய். இந்நிலையில் ஒரு வழியாக பாலிவுட் செல்ல முடிவு செய்துவிட்டார் விஜய் தேவரகொண்டா. அவர் தன் மனதை மாற்றிக் கொண்டதில் கரண் ஜோஹாருக்குத் தான் ஏக சந்தோஷம்.

விஜய் நடிப்பில் கடைசியாக வெளியான படம் வேர்ல்டு ஃபேமஸ் லவ்வர். ஐஸ்வர்யா ராஜேஷ், ராஷி கன்னா உள்ளிட்டோர் நடித்த அந்த படம் எதிர்பார்த்த அளவுக்கு போகவில்லை.