வேலை இல்லாமல் இருந்த சரோஜ் கான், அழைத்து வாய்ப்பு கொடுத்த சூப்பர் ஸ்டார்

பாலிவுட்டில் சுமார் 40 ஆண்டுகளாக டான்ஸ் மாஸ்டராக இருந்த சரோஜ் கான் இன்று அதிகாலை 2.30 மணிக்கு மாரடைப்பால் மரணம் அடைந்தார். அவருக்கு வயது 71. மூச்சுத் திணறல் காரணமாக கடந்த மாதம் 20ம் தேதி மும்பையில் உள்ள குருநானக் மருத்துவமனையில் அனுமதிக்கப்பட்டிருந்தார் சரோஜ் கான்.

இந்நிலையில் இன்று காலை மருத்துவமனையில் அவர் உயிர் பிரிந்தது. சரோஜ் கான் இறப்பால் ஏற்பட்டிருக்கும் வெற்றிடத்தை யாராலும் நிரப்ப முடியாது என்று திரையுலக பிரபலங்களும், ரசிகர்களும் தெரிவித்துள்ளனர். சிம்பிள் ஸ்டெப்ஸை அழகாக போடுவதில் வல்லவர் சரோஜ் கான். அவர் ஸ்டெப்ஸ் போடுவதை பார்த்தால் டான்ஸ் ஆடுவது எல்லாம் பெரிய விஷயமே இல்லை என்று தோன்றும். அந்த அளவுக்கு திறமையானவர் என்று ரசிகர்கள் தெரிவித்துள்ளனர்.

அத்தகைய திறமைசாலியான சரோஜ் கானும் ஒரு சமயத்தில் வேலை இல்லாமல் இருந்திருக்கிறார். இதை சரோஜ் கானே முன்பு பேட்டி ஒன்றில் தெரிவித்தார். அந்த பேட்டியில் சரோஜ் கான் கூறியிருந்ததாவது,

ஒரு முறை சல்மான் கான் என்னை தன் வீட்டிற்கு வருமாறு அழைத்தார். நானும் அவர் அழைப்பை ஏற்று சென்றேன். என்னை பார்த்த சல்மான் கான் எப்படி இருக்கிறீர்கள் சரோஜ்ஜி என்று கேட்டுவிட்டு அப்படியே வேலை பற்றியும் விசாரித்தார்.

உண்மையை சொல்ல வேண்டும் என்றால் தற்போது எனக்கு படங்களில் வேலையே இல்லை. அதனால் இளம் நடிகைகளுக்கு கிளாசிக்கல் டான்ஸ் கற்றுக் கொடுத்துக் கொண்டிருக்கிறேன் என்று நான் சல்மான் கானிடம் கூறினேன். நான் சொன்னதை கேட்ட சல்மான் கானோ, நீங்கள் என்னுடன் சேர்ந்து வேலை பாருங்கள் என்றார்.

சல்மான் கான் வாக்கு தவற மாட்டார் என்பது எனக்கு தெரியும். அதனால் அவர் சொன்னதை கேட்டு சந்தோஷமாக இருந்தது என்றார்.

சல்மான் கானின் தபாங் 3 படத்தில் சரோஜ் கானுக்கு சல்மான் கான் வாய்ப்பளித்தார் என்பது குறிப்பிடத்தக்கது. சரோஜ் கானும், சல்மான் கானும் சேர்ந்து பீவி ஹோ தோ எய்சி, அந்தாஸ் அப்னா அப்னா ஆகிய படங்களில் வேலை செய்திருக்கிறார்கள்.

சரோஜ் கானின் உடல் மும்பை மலாத் பகுதியில் இன்று காலை 7 மணிக்கு நல்லடக்கம் செய்யப்பட்டது. அவரின் பிராத்தனை கூட்டம் திங்கட்கிழமை நடைபெறும் என்று சரோஜ் கானின் மகள் சுகைனா தெரிவித்துள்ளார்.

இந்நிலையில் பாலிவுட் பிரபலங்கள் பலரும் தாங்கள் சரோஜ் கானுடன் சேர்ந்து வேலை செய்தபோது அல்லது நிகழ்ச்சிகளில் சந்தித்தபோது எடுத்த புகைப்படங்களை சமூக வலைதளங்களில் வெளியிட்டுக் கொண்டிருக்கிறார்கள்.

2 ஆயிரத்திற்கும் மேற்பட்ட பாடல்களுக்கு நடனம் அமைத்த சரோஜ் கானுக்கு சிறந்த நடன இயக்குநருக்கான தேசிய விருது 3 முறை கிடைத்தது. நடனத்திற்கு பெயர் போன பிரபல பாலிவுட் நடிகை மாதுரி தீக்ஷித்தின் பல பாடல்களுக்கு ஸ்டெப்ஸ் போட்டவர் சரோஜ் கான்.

தனது குருவை இழந்துவிட்டதாக மாதுரி தீக்ஷித் தெரிவித்துள்ளார். மாதுரிக்கு மட்டும் அல்ல ஸ்ரீதேவிக்கும் ஹிட்டான பல பாடல்களுக்கு சரோஜ் கான் தான் ஸ்டெப்ஸ் போட்டுக் கொடுத்தவர். பாலிவுட்டில் அடுத்தடுத்து மரணமாக இருப்பது ரசிகர்களை கவலை அடைய வைத்துள்ளது.

முன்னதாக கடந்த 20ம் தேதி சரோஜ் கானை மருத்துவமனையில் அனுமதித்தபோதே ரசிகர்கள் கவலை அடைந்தார்கள். கடவுளே, சரோஜ் கானையும் அழைத்துக் கொள்ள வேண்டாம். அவர் வாழட்டும் என்று தெரிவித்தனர். இந்நிலையில் சரோஜ் கான் இன்று மரணம் அடைந்தார்.