முடியாதுன்னா முடியாது தான்: சம்பளத்தை குறைக்க மறுக்கும் பிரபல ஹீரோ, ஹீரோயின்

கொரோனா வைரஸ் பிரச்சனையால் திரையுலகம் செயல்படாமல் உள்ளது. கோடை காலத்தில் தான் அதிக அளவில் படப்பிடிப்புகள் நடக்கும். ஆனால் இந்த ஆண்டு கோடை காலத்தில் படப்பிடிப்பு சுத்தமாக நடக்கவில்லை. முதல் லாக்டவுன் அமலுக்கு வந்ததில் இருந்து இதுவரை சினிமா படப்பிடிப்புகள் எதுவும் நடக்கவில்லை.

சின்னத்திரை ஷூட்டிங் துவங்கப்பட்டது. ஆனால் அந்த ஷூட்டிக்கில் கலந்து கொண்டவர்களில் சிலருக்கு கொரோனா வைரஸ் பாதிப்பு ஏற்பட்டுள்ளது. கொரோனா பிரச்சனையால் தயாரிப்பாளர்களின் நிலைமை கவலைக்கிடமாக இருக்கிறது. இந்நிலையில் அதிகம் சம்பளம் வாங்கும் நடிகர்கள், நடிகைகளை தங்களின் சம்பளத்தை குறைத்துக் கொள்ளுமாறு தயாரிப்பாளர்கள் கோரிக்கை விடுத்துள்ளனர்.

இந்நிலையில் ஒரு படத்திற்கு பல கோடி சம்பளம் வாங்கும் அந்த முன்னணி நடிகரிடம் பெரிய தயாரிப்பு நிறுவனம் சம்பளத்தை குறைக்கச் சொன்னதாம். அதற்கு நடிகரோ, அதை பற்றி மட்டும் என்னிடம் பேசாதீங்க, நடக்கவே நடக்காது என்று கறாராக கூறிவிட்டாராம்.

மேலும் கோலிவுட்டில் அதிக சம்பளம் வாங்கும் அந்த நடிகையும் தன் சம்பளத்தை குறைக்க மறுத்துவிட்டாராம். தயாரிப்பாளர் சம்பள குறைப்பு பேச்சை எடுத்தாலே நடிகைக்கு கோபம் வருகிறதாம். நான் சொன்னது சொன்னது தான், சம்பள குறைப்பு என்கிற பேச்சுக்கே இடம் இல்லை என்று நடிகை தெரிவித்துள்ளாராம்.

இசையமைப்பாளர்-நடிகர், இயக்குநர் உள்ளிட்டோர் எல்லாம் சம்பளத்தை குறைக்கும் போது இந்த முன்னணி நடிகரும், நடிகையும் இப்படி அடம்பிடிக்கிறார்களே என்று கோடம்பாக்கத்தில் பேசிக் கொள்கிறார்கள்.