ஆளப்போகிறான் தமிழன் - விஜய்க்கு நடிகர் பார்த்திபன் பாராட்டு!!

ஆளப்போகிறான் தமிழன். அமெரிக்க அதிபர் டிரம்பே டுவீட் செய்வார் தலைசிறந்த சிஎம் நீங்கள் என்று மறைமுகமாக மெர்சல் ஆடியோ விழாவில் நடிகர் பார்த்திபன் இந்தப் படத்தின் நாயகன் விஜய்யை பாராட்டி பேசினார்.

மெர்சல் படத்தின் ஆடியோ வெளியீட்டு விழா இன்று சென்னை நேரு ஸ்டேடியத்தில் பிரம்மாண்டமாக நடந்து வருகிறது. இந்த விழாவில் நடிகர் பார்த்திபன் பேசுகையில், '' ஆல்பபெட்டில் ஈபிஎஸ், ஓபிஎஸ் சேர்ந்தால் என்னவாகும் என்று எனக்குத் தெரியாது. ஆனால், சினிமாவில் விஜய்யும், விஜய்யின் ரசிகர்களும் இணைந்தால் மட்டுமே அட்லீஸ்ட் நூறு கோடி ரூபாய் கலெக்ட் செய்ய முடியும். விஜய், ரஹ்மான் இணைந்தால் மட்டுமே 200 கோடி ரூபாய் வசூல் செய்ய முடியும். தேனாண்டாள் தயாரிப்பு நிறுவனத்துடன் இணைந்தால் 300 கோடி ரூபாய் வசூல் செய்யும்.

அப்பனுக்கு தவறாத பிள்ளை தயாரிப்பாளர் முரளி. அவரது தந்தை ராம நாராயணன், 99 சிறிய படங்கள் தயாரித்த பணத்தை இந்த ஒரு படத்திற்கு முரளி செலவு செய்துள்ளார்.

விஜய்யை உண்மையான ஹீரோவாக ரசிக்கிறேன். சமீபத்தில் பெண் பத்திரிகை நிருபருக்கு பிரச்சனை வந்தபோது உடனே அவருக்கு ஆதரவாக பேசினார். இது உலகில் இருக்கும் அனைத்து பெண்களையும் ஆதரிப்பதாக இருந்தது.

ஆளப் போகிறான் தமிழன். சந்தோஷம். அடுத்த படத்துக்கு அமெரிக்க அதிபர் டிரம்ப் டுவீட் செய்வார். உலகில் மிகச் சிறந்த சிஎம் நீங்கள்தான் (விஜய்) என்று டுவீட் செய்வார். சிஎம் என்றால் கலெக்ஷன் மன்னர் என்று டிரம்ப் சொல்வார். தமிழனோ, தெலுங்கனோ ஆளப் போவது தலைசிறந்த மனிதனாக இருக்க வேண்டும். விவசாயி வாழ வேண்டும்'' என்றார்.

இந்தப் படத்திற்கு ஏ.ஆர். ரஹ்மான் இசையமைத்துள்ளார். தேனாண்டாள் படத்தின் 100வது திரைப்படம். விஜய் சினிமாவில் காலடி எடுத்து வைத்து 25 ஆண்டுகள் ஆகிறது. இவையனைத்தும் ஒன்றாக அமைய இந்த பிரம்மாண்ட விழா தற்போது நடந்து வருகிறது.

Actor Vijay is going to rule the state: actor Parthiban in mersal audio launch