சோகத்துக்கு மத்தியில் வெளியான நல்ல செய்தி: ஹாப்பி மூடில் ரஜினி ரசிகர்கள்!

கொரோனா பரவல் காரணமாக ஊரடங்கு, திரையரங்குகள் மூடல், ஐம்பது சதவீத பார்வையாளர்களுக்கு மட்டுமே அனுமதி போன்ற கட்டுப்பாடுகள், ஓடிடி வெளியீடு உள்ளிட்டவைகளால் திரையரங்கு உரிமையாளர்கள் திணறி வருகின்றனர். இந்நிலையில் கடந்த ஆண்டு 2021 திரையரங்குகளில் வெளியாகி வசூலில் சாதனை படைத்த படங்களின் பட்டியல் வெளியாகியுள்ளது.

அதில் முதல் இடத்தை விஜய்யின் 'மாஸ்டர்' பிடித்துள்ளது. கடந்த ஆண்டு பொங்கலுக்கு லோகேஷ் கனகராஜ் இயக்கத்தில் விஜய், விஜய் சேதுபதி, மாளவிகா மோகனன் உள்ளிட்டோர் நடிப்பில் வெளியான இந்தப்படம் ரசிகர்கள் மத்தியில் அமோக வரவேற்பினை பெற்றது. கொரோனா முதல் அலைக்குப் பின் திரையரங்கில் வெளியாகி, தியேட்டர் உரிமையாளர்களுக்கும், சினிமா ரசிகர்களுக்கும் பெரிதும் நம்பிக்கை அளித்தது இந்தப்படம்.

இந்தப்பட்டியலில் இரண்டாவது இடத்தை பிடித்துள்ளது ரஜினியின் 'அண்ணாத்த'. சிறுத்தை சிவா இயக்கத்தில் தீபாவளி வெளியீடாக ரிலீஸ் ஆனது இந்தப்படம். சன் பிக்சர்ஸ் தயாரித்த இந்தப்படத்தில் ரஜினி, நயன்தாரா, கீர்த்தி சுரேஷ், மீனா, குஷ்பு உள்ளிட்ட நட்சத்திர பட்டாளங்களே நடித்திருந்தனர். வசூல்ரீதியாக மிகப்பெரிய வரவேற்பை பெற்றது இந்தப்படம்.

இந்தப்பட்டியலின் மூன்றாவது இடத்தை சிவகார்த்திகேயனின் 'டாக்டர்' படம் பிடித்துள்ளது. ரசிகர்களின் மிக நீண்ட எதிர்பார்ப்பிற்கு மத்தியில் வெளியான இந்தப்படத்தை நெல்சன் திலீப்குமார் இயக்கியிருந்தார். இவர் தற்போது விஜய்யின் 'பீஸ்ட்' படத்தை இயக்கி வருகிறார்.

தனுஷ் - ஐஸ்வர்யா மீண்டும் இணைய போகிறார்களா?: விவாகரத்தில் புது ட்விஸ்ட்!
இதில் நான்காவது இடத்தை சிம்புவின் 'மாநாடு' படம் முடித்துள்ளது. சுரேஷ் காமாட்சி தயாரிப்பில், வெங்கட் பிரபு இயக்கத்தில் சிம்பு நடிப்பில் வெளியான படம் 'மாநாடு'. சிம்புவின் கம்பேக் படமாக அமைந்த மாநாட்டில் எஸ்.ஜே. சூர்யாவின் மிரட்டலான நடிப்பும் ரசிகர்கள் மத்தியில் அமோக வரவேற்பினை பெற்றது. திரையரங்குகளில் வெளியான இந்தப்படம் பாக்ஸ் ஆபிஸிலும் கலக்கியது.


இதனை தொடர்ந்து அடுத்தடுத்த இடங்களை கார்த்தியின் 'சுல்தான்'. தனுஷின் 'கர்ணன்', சுந்தர் சியின் 'அரண்மனை 3', விஜய் ஆண்டனியின் 'கோடியில் ஒருவன்', விஷாலின் 'எனிமி' படங்கள் பிடித்துள்ளது. இந்த தகவல் ரசிகர்கள் மத்தியில் உற்சாகத்தை ஏற்படுத்தியுள்ளது.

இந்த பட்டியல் தமிழ்நாடு திரையரங்கம், மல்டி பிளக்ஸ் உரிமையாளர்கள் சங்கத் தலைவர் திருப்பூர் சுப்ரமணியம், தயாரிப்பாளர், விநியோகஸ்தர் சிங்காரவேலன் ஆகிய இருவரும் திரட்டிய தரவுகளின் அடிப்படையில் வரிசைப்படுத்தப்பட்டுள்ளதாக கூறப்பட்டுள்ளது.