‘24’ மூன்று நாளில் 1 மில்லியன் டாலர் வசூல்!

சூர்யா நடித்துள்ள ‘24’ படம் அமெரிக்காவில் 3 நாளில் ஒரு மில்லியன் டாலர் வசூலித்து சாதனை படைத்துள்ளது.

விக்ரம் குமார் இயக்கத்தில் சூர்யா - சமந்தா நடித்துள்ள படம், ‘24’. ஏ.ஆர். ரஹ்மான் இசையமைத்துள்ளார். கடந்த வெள்ளிக்கிழமை ரிலீஸானது. வெளிநாடுகளிலும் ‘24’ படத்தின் வசூல் அதிக கவனம் பெற்றுள்ளது. அமெரிக்காவில் ‘24’ படம் தமிழ், தெலுங்கு என இரு மொழிகளிலும் வெளியாகியுள்ளது. இந்நிலையில் படம் வெளியான மூன்றே நாள்களில் அமெரிக்காவில் ஒரு மில்லியன் டாலர் வசூலித்து சாதனை செய்துள்ளது. அதாவது 3 நாள்களில் 6.65 கோடி ரூபாய்.

அமெரிக்காவில் இதுவரை வெளியான சூர்யா படங்களில் அதிகம் வசூல் செய்த படம் என்கிற பெருமை ‘24’ படத்துக்குக் கிடைத்துள்ளது. சினிகேலக்ஸி நிறுவனம் அங்கு இப்படத்தை விநியோகம் செய்துள்ளது. இதற்கு முன்பு இதுபோன்ற வெளிநாட்டுப் பகுதிகளில் ஹிந்திப் படங்களுக்கு பஞ்சாபி படங்கள்தான் அதிக போட்டி அளிக்கும். இப்போது தமிழ்ப் படங்கள் அந்த இடத்தைப் பிடித்துள்ளதாக சினிமா நிபுணர்கள் கருத்து தெரிவித்துள்ளார்கள்.