கோவாவில் 47வது சர்வதேச திரைப்பட விழா தொடக்கம்!

கோவாவில் மத்திய அரசு நடத்தும் 47வது சர்வதேச திரைப்பட விழா இன்று முதல் தொடங்கியுள்ளது.

தலைநகர் பனாஜியில், தொடங்கிய இந்த விழாவில், மூத்த திரைப்பட இயக்குனர் ரமேஷ் சிப்பி, தென்கொரிய தூதர் ஹியூன் சோ ஆகியோர் திரைப்பட விழாவை தொடங்கி வைத்தனர்.

இதில், மத்திய பாதுகாப்புத் துறை அமைச்சர் மனோகர் பாரிக்கர் மற்றும் கோவா முதலமைச்சர் லக்ஷ்மிகாந்த் பர்சேகர் சிறப்பு விருந்தினர்களாக பங்கேற்றனர். மனோகர் பாரிக்கர் பேசுகையில், திரைப்பட விழாவை நடத்தத் தேவையான கூடுதல் வசதிகள் வரும் நாட்களில், கோவாவில் ஏற்படுத்தப்படும் என்றார்.

கோவா அரசுக்குத் தேவையான நிதி உதவிகளை, மத்திய அரசு வழங்கும் என்றும் கூறிய அவர், விழா ஏற்பாடுகள் சிறப்பாக இருந்ததாகவும் தெரிவித்தார். இத்தகைய திரைப்பட விழாக்கள், சர்வதேச அளவில் இந்திய கலாசாரத்தை புரிந்துகொள்ள உதவும் என்றும் மனோகர் பாரிக்கர் குறிப்பிட்டார்.

ஆசியாவிலேயே பிரமாண்டமான திரைப்பட விழா இதுவாகும். 47வது சர்வதேச திரைப்பட விழாவுக்கான ஏற்பாடுகளை, மத்திய அரசின் திரைப்பட விழாக்களுக்கான இயக்குனரகம், கோவா பொழுதுபோக்குத் துறை ஆகியவை இணைந்து செய்துள்ளன.

8 நாட்களுக்கு நடைபெறும் இவ்விழாவில், உலகம் முழுவதும் 90 நாடுகளைச் சேர்ந்த பல்வேறு மொழிகளிலான 300க்கும் அதிகமான திரைப்படங்கள் திரையிடப்பட உள்ளன. இதற்காக, ஏராளமான சினிமா ஆர்வலர்கள், நடிகர்கள் மற்றும் இயக்குனர்கள், தொழில்நுட்ப கலைஞர்கள் திரண்டுள்ளது குறிப்பிடத்தக்கது.

47th International Film Festival of India kicks off in Goa today.