அமெரிக்காவிலும் கலக்கும் அச்சம் என்பது மடமையடா!

கௌதம் மேனன் இயக்கத்தில் சிம்பு நடித்து வெளியாகி இருக்கும் அச்சம் என்பது மடமையடா திரைப்படம் ரசிகர்களிடம் நல்ல வரவேற்பை பெற்றுள்ளது. அமெரிக்காவின் பாக் ஆஃபிஸிலும் இந்தப்படம் கலக்கி வருகிறது. அமெரிக்காவில் தமிழ் மற்றும் தெலுங்கில் 90க்கும் மேற்பட்ட தியேட்டர்களில் இந்தப்படம் வெளியானது. வெளியான முதல் நாளில் 1 மில்லியன் டாலர் வசூல் செய்து சாதனை படைத்துள்ளது. மேலும் ரசிகர்களிடையே நல்ல விமர்சனங்களையும் பெற்றுள்ளது. சிம்புவின் திரை வாழ்க்கையில் முதன் முறையாக பெரும் வரவேற்பை இந்தப்படம் அமெரிக்காவில் பெற்றுள்ளது என்பது குறிப்பிடத்தக்கது.

மேலும் சனி மற்றும் ஞாயிற்றுக்கிழமைகளில் வசூல் இரண்டு மடங்காகும் என்று விநியோகஸ்தர்கள் கருத்து தெரிவித்துள்ளனர். கௌதம் மேனனின் வழக்கமான பாணியில் ரசிகர்களை கவரும் வகையில் படம் எடுக்கப்பட்டுள்ளது. சிம்பு தனது சிறப்பான நடிப்பை படத்தில் வெளிப்படுத்தி இருப்பதாக ரசிகர்கள் தெரிவித்துள்ளனர். டான் மெக்கார்தர் ஒளிப்பதிவு, ஏ.ஆர்.ரஹ்மான் இசை என படத்திற்கு கூடுதல் பலம் இருப்பதால் ரசிகர்களிடம் பெரும் வரவேற்பு கிடைத்துள்ளது. கௌதம் மற்றும் சிம்பு மீண்டும் இணைந்து வியாபார ரீதியாகவும், வசூல் ரீதியாகவும் தங்களை நிரூபித்துள்ளதாக ரசிகர்கள் கருத்து தெரிவித்துள்ளனர்.