மக்களின் தலைவர்: தமிழக முதலமைச்சர் மு.க. ஸ்டாலினுக்கு நடிகர் சிரஞ்சீவி புகழாரம்!

தமிழக முதலமைச்சராக கடந்த மே மாதம் மு.க.ஸ்டாலின் பதவி ஏற்றார். அதன்பின்னர் பெண்களுக்கு இலவச பஸ் பயணம், அனைத்து ஜாதியினரும் அர்ச்சகர் ஆகலாம் திட்டம், கோவில்களில் தமிழ் மொழியில் அர்ச்சனை, பள்ளி, கல்லூரி மாணவர்களுக்கு இலவச பஸ் வசதி, வீடு தேடி வந்து மருத்துவம் பார்க்கும் திட்டம் போன்ற பல்வேறு திட்டங்களைச் செயல்படுத்தி வருகிறார்.

தமிழக முதலமைச்சராக பொறுப்பேற்ற பின் மு.க. ஸ்டாலின் கொண்டு வந்த திட்டங்கள் யாவும் அணைத்து தரப்பினரிடமும் வாழ்த்துக்களை பெற்றுள்ளது. கட்சி சார்பு தாண்டி அனைவரும் மு.க. ஸ்டாலினின் செயல்பாடுகளை வாழ்த்தி வருகின்றனர். இந்நிலையில் தெலுங்கு திரையுலகில் முன்னணி நடிகராக வலம் வரும் சிரஞ்சீவி நேற்றைய தினம் தமிழக முதலமைச்சர் மு.க.ஸ்டாலினைச் சந்தித்துப் பேசியுள்ளார்.

இது தொடர்பாக அவர் தனது ட்விட்டர் பக்கத்தில், 'தமிழக முதல்வர் ஸ்டாலினைச் சந்தித்ததில் மகிழ்ச்சி. கட்சிகள் தாண்டி அவர் எடுத்திருக்கும் சில பயனுள்ள முயற்சிகள் மூலம் சிறந்த அரசியல் தலைவராக அவர் உயர்ந்திருப்பதற்கும், மக்களின் தலைவராக, தொலைநோக்குப் பார்வை மற்றும் அர்ப்பணிப்புடன், கொரோனா காலகட்டத்தில் சிறப்பான ஆட்சி தந்து வருவதற்காகவும் வாழ்த்துகள் கூறினேன்' என குறிப்பிட்டுள்ளார்.

‘அரண்மனை 3’ பட பாடல் செய்த தரமான சம்பவம்: கொண்டாட்டத்தில் ரசிகர்கள்!
முன்னதாக பவன் கல்யாண் தமிழக முதலமைச்சர் மு.க. ஸ்டாலினுக்கு வாழ்த்து தெரிவித்து தனது ட்விட்டர் பக்கத்தில் அறிக்கை ஒன்றை வெளியிட்டிருந்தார். அதில், உங்களது ஆட்சி நிர்வாகம், உங்கள் அரசின் செயல்பாடுகள் உங்கள் மாநிலத்திற்கு மட்டுமல்ல நாட்டில் உள்ள அனைத்து மாநிலங்களுக்கும், அனைத்து அரசியல் கட்சிகளுக்கும் ஊக்கம் அளிக்கும் விதத்தில் உள்ளது. உங்களுக்கு மீண்டும் எனது மனமார்ந்த நல்வாழ்த்துக்கள் என தெரிவித்திருந்தார்.