Andhadhun: தனுஷா? சித்தார்த்தா? ஜெயிக்கப்போவது யார்?

பாலிவுட்டில் மிகப்பெரிய ஹிட் கொடுத்த அந்தாதூன் படத்தை தமிழில் ரீமேக் செய்யும் முயற்சியில் தனுஷ் மற்றும் சித்தார்த் ஆகியோரிடையே கடும் போட்டி ஏற்பட்டுள்ளது.

ஶ்ரீராம் ராகவன் இவர் தமிழகத்தை சேர்ந்தவர் படிப்பிற்கு பின் இந்தி சினிமாவில் நுழைந்தவர். வித்தியாசமான திரைக்கதைகளுடன் திரில்லர் படங்களை இயக்கி தனக்கென தனி ரசிகர் பட்டாளத்தை இந்தியில் உருவாக்கியவர். தமிழில் கௌதம் மேனனுடன் இணைந்து என்னை அறிந்தால் படத்தின் திரைக்கதையிலும் வேலை செய்துள்ளார். இவர் இயக்கத்தில் கடந்தாண்டு வெளியான படம் அந்தாதூன்.

ஆயூஷ்மான் குரானா, ராதிகா ஆப்தே நடித்த இப்படம் பல முன்னனி ஹிரோக்களின் படங்களை முந்தி மிகப்பெரும் வெற்றி பெற்றது. கண் தெரியாத இசைக் கலைஞன் ஒரு கொலை வழக்கில் மாட்டிக்கொள்வதை சொல்லும் இந்தப்படம் உலகளவில் நல்ல வரவேற்பையும் பெற்றது.

இப்படம் மற்ற மொழிகளில் ரீமேக் செய்ய மிகப்பெரும் விலைக்கு விற்கப்பட்டது. கடந்த மாதம் நடிகர் சித்தார்த் தான் தமிழில் இப்படத்தில் நடிப்பதற்காக தமிழ் உரிமையை வாங்கும் முயற்சியில் ஈடுபட்டார். ஆனால் கடந்த சில நாட்கள் முன் நடிகர் தனுஷூம் இப்படத்தை வாங்கும் முயற்சியில் ஈடுபட்டுள்ளதாக தகவல்கள் வெளி வந்துள்ளது.

ஒரே நேரத்தில் இரண்டு ஹீரோக்கள் ஒரு படத்திற்காக மோதிக்கொள்கொன்றனர். சித்தார்த்திற்கும், தனுஷூக்கும் உள்ள லடாய் சினிமா உலகம் அறிந்ததே. தனுஷ் தாக்கி சித்தார்த் போடும் டுவிட்கள் அவ்வப்போது பரபரப்பை கிளப்பிக் கொண்டிருக்கும். இந்நிலையில் யார் இதில் வெல்வார்கள் என்பது விரைவில் தெரிந்துவிடும். இருவரில் யார் நடித்தாலும் ரசிகர்களுக்கு ஒரு நல்ல ட்ரீட் காத்திருக்கிறது என்பது குறிப்பிடத்தக்கது.