Gayathri Raghuram: மதுபோதையில் இருந்தேனா? உங்க இஷ்டத்துக்கு சொல்ரீங்களே.. காயத்ரி ரகுராம் விளக்கத்துடன் சாடல்

சென்னை : மது போதையில் கார் ஓட்டியதாக நடிகை காயத்ரி ரகுராம் மீது போலீசார் வழக்குப் பதிவு செய்துள்ள விவகாரம் குறித்து விளக்கியுள்ளார்.

பிரபு மற்றும் பிரபுதேவா ஆகியோரது நடிப்பில் வந்த சார்லி சாப்ளின் படத்தின் மூலம் நடிகையானவர் காயத்ரி ரகுராம். இப்படத்தைத் தொடர்ந்து ஸ்டைல், பரசுராம், விசில், விகடன், வை ராஜா வை, தாரை தப்பட்டை உள்பட பல படங்களில் நடித்துள்ளார்.

டான்ஸ் மாஸ்டராகவும் இருக்கிறார். தனியார் தொலைக்காட்சியில் ஒளிபரப்பான பிக் பாஸ் நிகழ்ச்சியிலும் கலந்து கொண்டு மிகவும் பிரபலமானார். இவ்வளவு ஏன், பாஜகவின் கலாச்சார பிரிவு செயலாளராகவும் இருக்கிறார் என்பது குறிப்பிடத்தக்கது.

இந்த நிலையில், சென்னை திரு.வி.க. பாலம் பகுதியில் அபிராமபுரம் போலீசார் நேற்று முன் தினம் இரவு வாகன சோதனையில் ஈடுபட்டுக் கொண்டிருந்தனர். அப்போது, அந்த வழியாக வந்த நடிகை காயத்ரி ரகுராம் மது போதையில் கார் ஓட்டி வந்ததாகவும், அவர் மீது அபிராமபுரம் போக்குவரத்து போலீசார் வழக்குப் பதிவு செய்ததாகவும், ரூ.3500 அபராதமும் விதித்ததாகவும் செய்திகள் வெளியாகின.

கயாத்திரி ரகுராம் விளக்கம் :
இந்நிலையில் அவர் குறித்த செய்திக்கு விளக்கம் அளித்துள்ளார். அதில், “எதையோ மறைக்க என்னை செய்தியாக்கிவிட்டனர். நீங்கள் என்ன வேண்டுமானாலும் எழுதுங்கள் ஆனால் நான் துணிச்சலுடன் வாழ்வேன்.

நான் எனது படப்பிடிப்பை முடித்து வீடு திரும்புகையில் என் சக நடிகரை அவரது வீட்டில் இறக்கிவிட்டு திரும்பிக் கொண்டிருந்தேன். அப்போது வழக்கமான ரோந்து பணியில் ஈடுபட்டுக் கொண்டிருந்த போலீஸார் வாகன சோதனை செய்தனர். மற்றபடி எனக்கும், அவர்களுக்கு எந்த வாக்குவாதமும் ஏற்படவில்லை. அங்கிருந்து 10 நிமிடங்களில் நானே காரை ஓட்டிக் கொண்டு வீடு சென்றேன்.

என்னை பற்றி செய்தி வெளியிட்ட நிருபர் தான் போதையில் இருந்திருப்பார் போலும். அவருக்கு என்ன என்ன தோன்றியதோ அத்தனையும் எழுதியுள்ளார்.

போதையில் இருந்த அந்த நிருபரை விட்டு என்னை குறிவைக்கின்றனர். இங்கு தனி மனித சுதந்திரம் என்பதே இல்லாமல் போய்விட்டது. ” என தெரிவித்துள்ளார்.