இவங்க மூன்று பேர் முடிவு செய்யட்டும், 70% கூட சம்பளத்தை குறைக்க தயார்: பிக் பாஸ் மஹத்

தமிழ் சினிமாவில் வளர்ந்து வரும் நிடிகர்களில் ஒருவர் மஹத் ராகவேந்திரா. அவர் விஜய்யின் ஜில்லா, சிம்புவின் அன்பானவன் அசராதவன் அடங்காதவன் போன்ற படங்களில் நடித்துள்ளார்.

தமிழ் பிக்பாஸ் 2வது சீசனில் போட்டியாளராக கலந்துகொண்ட அவர் அதற்கு பிறகு தற்போது இரண்டு படங்களில் ஹீரோவாக நடித்து வருகிறார். 'கெட்டவன்னு பேரெடுத்த நல்லவன்டா' படத்தில் மஹத்துக்கு ஜோடியாக ஐஸ்வர்யா தத்தா நடிக்கிறார், இவன் தான் உத்தமன் என்ற படத்தில் யாஷிகா ஜோடியாக நடிக்கிறார்.

தற்போது கொரோனா லாக்டவுன் காரணமாக சினிமா தயாரிப்பாளர்கள் அதிகம் நஷ்டத்தை சந்தித்து உள்ள சூழ்நிலையில் விஜய் ஆண்டனி உள்ளிட்ட பல நடிகர்கள் தங்கள் சம்பளத்தை குறைப்பதாக தெரிவித்துள்ளனர். காமெடி நடிகை ஆர்த்தி தான் ஒரு ருபாய் மட்டும் சம்பளம் வாங்கி கொண்டு நடிக்க தயார் என தெரிவித்துள்ளார். இயக்குனர் ஹரி, ஹரிஷ் கல்யாண் போன்றவர்கள் சம்பளத்தை 25 குறைத்துக்கொள்வதாக அறிவித்துள்ளனர்.

இந்நிலையில் நடிகர் மஹத் வெளியிட்டுள்ள வீடியோ ஒன்றில் தான் 70% சதவீதம் கூட சம்பளத்தை குறைத்து கொள்ள தயார் என தெரிவித்துள்ளார்.

அவர் கூறியிருப்பதாவது..

"நானும் 10 வருஷமா இந்த இண்டஸ்ட்ரில இருக்கேன். சில படங்கள் பண்ணி இருக்கேன். இன்னும் நிறைய படங்கள் பண்ணனும்னு ஆசைப்படறேன். இப்போ தான் 2 படம் ஹீரோவா நடிக்க வாய்ப்பு கிடைச்சிருக்கு. கொரோனா லாக்டவுன் காரணமாக நிறைய பேர் பாதிக்கப்பட்டிருக்காங்க. முக்கியமா உழைப்பாளர்கள் பாதிக்கப்பட்டிருக்காங்க. இதுல ரொம்ப முக்கியமா பாதிக்கப்பட்டிருக்கிறது நம்மள வெச்சு படம் எடுக்குற தயாரிப்பாளர்கள், படத்தை வாங்குகிற டிஸ்ட்ரிபுயூட்டர்ஸ், தியேட்டர் உரிமையாளார்கள் தான்"

"இவங்க மூன்று பேரும் சேர்ந்து முடிவெடுத்து, 'எங்களுக்கு இவ்ளோ தான் கட்டுப்படி ஆகும், இவ்ளோ தான் சம்பளம் கொடுக்க முடியும் என அறிக்கை கொடுத்தால் அதற்க்கு ஒத்துழைக்க நான் தயார். அது 20% சம்பளமாக இருந்தாலும் சரி, 70 சதவீதமாக இருந்தாலும் குறைக்க நான் ரெடி. என்னை போல வளர்ந்துவரும் நடிகர்களும் ஒத்துழைப்பார்கள் என நம்புகிறேன்" என மஹத் கூறியுள்ளார்.