எனக்கு ஒரு பிரச்சனைனா விஜய் வருவார்: டாப் ஸ்டார் பிரசாந்த் ஓப்பன் டாக்!

சமீபத்தில் யூடியூப் சேனல் ஒன்றிற்கு பேட்டியளித்த நடிகர் பிரசாந்த், எனக்கு ஒரு பிரச்சனைனா விஜய் வருவார், அவருக்கு நான் வருவேன் என கூறியுள்ளார்.

வைகாசி பொறந்தாச்சி’ என்ற படத்தின் மூலம் தமிழ் சினிமாவில் அறிமுகமானவர் நடிகர் தியாகராஜனின் மகன் பிரசாந்த். அதன்பிறகு பல்வேறு படங்களில் நடித்து, தமிழ் சினிமாவின் முன்னணி நடிகர்களில் ஒருவராக வளர்ந்தார்.

ஒரு காலக்கட்டத்தில் விஜய், அஜித் உள்ளிட்ட நடிகர்களுக்கு இணையாக பார்க்கப்பட்ட பிரசாந்த், 2003 ஆம் ஆண்டு வெளியான வின்னர் படத்திற்குப் பிறகு ஹிட் படமே கொடுக்க முடியாமல் தவித்து வந்தார்.

இந்நிலையில், சமீபத்தில் வெளியான தெலுங்கு பட டீசர் ஒன்றில், அவர் குணச்சித்திர வேடத்தில் நடித்திருப்பதைப் பார்த்த ரசிகர்கள் மிகவும் வருத்தமடைந்தனர். மேலும், அவர் மீண்டும் வெற்றி படங்களைத் தரவேண்டும் என சமூக வலைத்தளங்களில் ஆதரவு கொடுத்தனர். இதன்பின்னர், அவரின் ஜானி படத்தின் டிரைலர் வெளியாகி ஓரளவு வரவேற்பைப் பெற்றது.

இதைத் தொடர்ந்து, அவர் சமீபத்தில் யூடியூப் சேனல் ஒன்றுக்கு பேட்டியளித்துள்ளார். அப்போது அவர் சிம்பு, அஜித் ஆகியோருடனான தனது நட்பு பற்றி விவரித்தார். மேலும், “விஜய்க்கு ஒரு பிரச்சனை என்றால் நான் வருவேன், அதேபோல் எனக்கு ஒன்று என்றால் அவர் வருவார். நாங்கள் எல்லோரும் ஒரு குடும்பம்தான்” என வெளிப்படையாக பேசி அனைவரையும் நெகிழ்ச்சியடைய வைத்துள்ளார்.