சாதி, மத நம்பிக்கையற்ற பாதையில் நடப்பதால், பதிவுத் திருமணம்: மூடர் கூடம் நவீன்!

மூடர் கூடம் படத்தின் இயக்குனர் நவீன் பதிவு திருமணம் செய்து கொண்டதாக டுவிட்டர் பக்கத்தில் தெரிவித்துள்ளார்.

மூடர் கூடம் படத்தின் மூலம் மிகவும் பிரபலமானவர் இயக்குனர் நவீன். இப்படத்தை அவர் இயக்கியுள்ளார். மேலும், அதில், ஒரு நடிகராகவும் தன்னை நிரூபித்துள்ளார். இப்படத்தைத் தொடர்ந்து விஜய் ஆண்டனி மற்றும் ஷாலினி பாண்டே ஆகியோரது நடிப்பில் உருவாகி வரும் புதிய படத்தை இயக்கி வருகிறார். இப்படத்தைத் தொடர்ந்து அலாவுதீனின் அற்புத கேமரா என்ற படத்தையும் இயக்கி நடித்துள்ளார். இப்படத்தில், இவருக்கு ஜோடியாக கயல் ஆனந்தி நடித்துள்ளார். இப்படம் விரைவில் திரைக்கு வரவுள்ளது.

இந்த நிலையில், இயக்குனர் நவீன் தான் பதிவு திருமணம் செய்து கொண்டதாக டுவிட்டர் பக்கத்தில் அறிவித்துள்ளார். இது குறித்து, அவர் கூறுகையில், ”எனக்கும் சிந்துவிற்கும் நடந்தது பதிவு திருமணம். நாங்கள் இருவரும் சாதிமத நம்பிக்கையற்ற பகுத்தறிவு பாதை நடப்பவர்கள் என்பதால் தான் காதல் பிறந்தது. என்றும் சிந்து சிந்துவாகவே இருப்பார். நாங்கள் மத எதிர்ப்பாளர்கள் இல்லை- மத மறுப்பாளர்கள், மனித சமத்துவத்தின் ஆதரவாளர்கள் என்று குறிப்பிட்டுள்ளார்.

அதற்கு முன்னதாக பதிவிட்ட மற்றொரு பதிவில் கூறியிருப்பதாவது: நவீன் என்பது என் அம்மா சிவசங்கரி நாவல் படிச்சிட்டு வெச்ச பேரு. என் ஊருல போயி நீங்க ஷேக்தாவுத் எனும் என் சான்றிதழ் பெயரை சொல்லி விசாரித்தால் எவர்க்கும் தெரியாது. நான் இஸ்லாமிய குடும்பதிலிருந்து வந்தவன் என்பதை நானே பல நேர்காணல்களில் கூறியுள்ளேன். இதெல்லாம் கண்டுபிடிப்பில் சேராது என்றும் அவர் குறிப்பிட்டுள்ளார்.

நவீன் உடன் இணைந்து மூடர் கூடம் படத்தில் நடித்த சிந்து ரெட்டியை தான் அவர் திருமணம் செய்து கொண்டுள்ளார் என்பது குறிப்பிடத்தக்கது. ஆனால், அப்போதே, மூடர் கூடம் படத்தின் விக்கிபீடியா பக்கத்தில் சிந்து நவீன் என்று குறிப்பிடப்பட்டிருந்தது என்பது குறிப்பிடத்தக்கது.