பருத்திவீரன் ’சித்தப்பு’ சரவணனுக்கு பன்றிக் காய்ச்சல்- மருத்துவமனையில் அனுமதி

பருத்திவீரன் படத்தில் சித்தப்பூ கதாபாத்திரத்தில் நடித்து வரவேற்பு பெற்ற நடிகர் சரவணனுக்கு பன்றிக்காய்ச்சல் பாதிப்பு ஏற்பட்டுள்ளது. தற்போது அவர் தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார்.

தமிழ் சினிமாவில் உதவி இயக்குநராக கால் பதித்து, பிறகு ஹீரோவாக நடித்து தற்போது குணச்சித்திர கதாபாத்திரங்களில் கலக்கி வருபவர் சரவணன். சமீபத்தில் வெளியான கடைக்குட்டி சிங்கம் படத்தில் இவர் ஏற்றிருந்த கதாபாத்திரம் அவருக்கு நல்ல பெயரை பெற்று தந்தது.

தொடர்ந்து பல படங்களில் சரவணன் நடித்து வரும் நிலையில், தீபாவளி பண்டிகையை கொண்டாட சேலத்திற்கு இவர் சென்றுள்ளார். அப்போது திடீரென அவருக்கு காய்ச்சல் ஏற்பட்டுள்ளது. பிறகு அவர், மருத்துவரை அணுகினார்.

காய்ச்சல் தொடர்பாக பரிசோதனை செய்து பார்த்ததில் அவருக்கு பன்றிக்காய்ச்சல் இருப்பது தெரியவந்தது. இதை கேட்டு நடிகர் சரவணனின் குடும்பத்தார் அதிர்ச்சி அடைந்தனர். தற்போது அவர் சென்னையில் உள்ள தனியார் மருத்துவமனையில் அனுமதிக்கப்பட்டுள்ளார்.

மேலும், தான் தைரியமாக இருப்பதாகவும், விரைவில் காய்ச்சல் குணமடைந்து வீடு திரும்புவேன் என்றும் சரவணனே கூறியதாக அவருக்கு நெருங்கிய திரைத்துறை நண்பர்கள் தெரிவித்து வருகின்றனர்.