எங்க வீட்டு பிள்ளையா? எஸ்கே16 படத்தை பூஜையுடன் தொடங்கிய சிவகார்த்திகேயன்!

இயக்குனர் பாண்டிராஜ் இயக்கத்தில் சிவகார்த்திகேயன் நடிக்கும் எஸ்கே16 படத்தின் படப்பிடிப்பு இன்று பூஜையுடன் தொடங்கியுள்ளது.

தமிழ் சினிமாவில் முன்னணி நடிகர்களில் ஒருவராக இருப்பவர் நடிகர் சிவகார்த்திகேயன். தொடர்ந்து பல மாஸ் ஹிட் படங்களை கொடுத்து வருகிறார். கடந்த சில ஆண்டுகளில் வேலைக்காரன், சீமராஜா, கனா ஆகிய படங்களை கொடுத்துள்ளார். இப்படங்களைத் தொடர்ந்து மிஸ்டர் லோக்கல், எஸ்கே14, ஹீரோ (15ஆவது படம்), எஸ்கே16, எஸ்கே17 ஆகிய படங்களில் நடிக்கிறார். இதில், மிஸ்டர் லோக்கல் வரும் 17ம் தேதி திரைக்கு வர உள்ளது.

இந்த நிலையில், எஸ்கே 16 படத்தின் படப்பிடிப்பு இன்று பூஜையுடன் தொடங்கியுள்ளது. இதில், ஐஸ்வர்யா ராஜேஷ், சூரி, இயக்குனர் பாண்டிராஜ் ஆர்.கே.சுரேஷ், இமான், நட்டி என்கிற நடராஜ், அனு எம்மாணுவேல் ஆகியோர் பலர் கலந்து கொண்டனர்.

சிவகார்த்திகேயனின் எஸ்கே16 படத்தை இயக்குனர் பாண்டிராஜ் இயக்குகிறார். சன் பிக்சர்ஸ் நிறுவனம் இப்படத்தை தயாரிக்கிறது. இமான் இப்படத்திற்கு இசையமைக்கிறார். சிவகார்த்திகேயனுக்கு ஜோடியாக அனு இம்மானுவேல் ஜோடியாக நடிக்கிறார். மேலும், சூரி, யோகி பாபு, நடராஜ், சமுத்திரக்கனி, இயக்குனர் பாரதிராஜா, ஆர்கே சுரேஷ், ஐஸ்வர்யா ராஜேஷ் ஆகியோர் பலர் நடிக்கின்றனர் என்பது குறிப்பிடத்தக்கது. இப்படம் 2020ம் ஆண்டு திரைக்கு வரும் என்று எதிர்பார்க்கப்படுகிறது.

இன்னும் டைட்டில் வைக்கப்படாத இப்படத்திற்கு எங்க வீட்டு பிள்ளை என்ற தலைப்பு கச்சிதமாக இருக்கும் எனவும், இந்த தலைப்பிற்கு சிவகார்த்திகேயன் சரியானவர் எனவும் சமூக வலைதளங்களில் தகவல் வெளியாகி வருகிறது. ஆனால், இப்படத்திற்கு எங்க வீட்டு பிள்ளை தான் தலைப்பா என்பது குறித்து விரைவில் அறிவிப்பு வெளியாகும் என்று எதிர்பார்க்கப்படுகிறது.