புற்றுநோயால் பாதிக்கப்பட்ட நடிகர் தவசி மரணம்: திரையுலகினர் இரங்கல்

சிவகார்த்திகேயனின் வருத்தப்படாத வாலிபர் சங்கம் உள்ளிட்ட பல படங்களில் நடித்தவர் தவசி. கருப்பன் குசும்புக்காரன் என்கிற ஒற்றை வசனம் மூலம் பிரபலமானவர். அவருக்கு புற்றுநோய் ஏற்பட்டு சிகிச்சைக்கு பணம் இல்லாமல் கஷ்டப்படுவதாக கடந்த 16ம் தேதி தகவல் வெளியானது.

சிவகார்த்திகேயன் பட நடிகருக்கு புற்றுநோய்: உதவி கேட்டு கோரிக்கை

எலும்பும், தோலுமாக இருக்கும் தவசி கையெடுத்து கும்பிட்டு உதவி கேட்ட புகைப்படத்தை பார்த்த அனைவரும் அதிர்ச்சி அடைந்தார்கள். அந்த புகைப்படத்தை பார்த்த திருப்பரங்குன்றம் தொகுதி திமுக எம்.எல்.ஏ. டாக்டர் சரவணன் தவசியை தன் மருத்துவமனையில் அனுமதித்து இலவசமாக சிகிச்சை அளித்து வந்தார். தவசி மருத்துவமனையில் இருக்கும் புகைப்படங்களை சரவணன் வெளியிட்டார்.

இந்நிலையில் தவசி சிகிச்சை பலனின்றி உயிரிழந்தார். அவரின் மரண செய்தி அறிந்த திரையுலகினரும், ரசிகர்களும் சமூக வலைதளங்களில் தங்கள் ஆழ்ந்த இரங்கலை தெரிவித்துள்ளனர்.

தவசிக்கு புற்றுநோய் இருப்பது தெரிய வந்ததும் சிவகார்த்திகேயன் ரூ. 25 ஆயிரமும், சூரி ரூ. 20 ஆயிரமும் கொடுத்தார்கள். மேலும் மருத்துவமனையில் தவசியுடன் இருக்கும் அவரின் குடும்பத்தாருக்கு மதுரையில் இருக்கும் தன் ஹோட்டலில் இருந்து உணவு வழங்கி வந்தார் சூரி.

விஜய் சேதுபதியும், சிம்புவும் தலா ரூ. 1 லட்சம் கொடுத்தனர். ரஜினியும் தவசிக்கு நிதியுதவி வழங்கினார். ஆனால் அவர் எவ்வளவு கொடுத்தார் என்கிற தகவல் வெளியாகவில்லை.

புற்றுநோய் என்கிற தகவல் வெளியான இரண்டு வாரத்திற்குள் தவசி இறந்த செய்தி அனைவரையும் கவலை அடையச் செய்துள்ளது என்பது குறிப்பிடத்தக்கது.