சாதியை ஒழிக்க காதல் திருமணம் செய்யுங்கள்: நடிகர் விஜய் சேதுபதி!

விஜய் சேதுபதி நல்ல நடிகர் என்பதையும் தாண்டி, சமூக பிரச்சனைகளில் தனது கருத்துகளை அதிரடியாக கூறி வருபவர். அதன் ஒரு கட்டமாக தற்போது பிரபல தொலைக்காட்சி சேனலில் சமூக பொறுப்புள்ள நிகழ்ச்சி ஒன்றையும் தொகுத்து வழங்கி வருகிறார்.

அத்துடன், சீனுராமசாமி இயக்கும் மாமனிதன் படத்திலும் நடித்து வருகிறார். இதன் படப்பிடிப்பு கேரள மாநிலம் ஆலப்புழா பகுதியில் நடைபெற்று வருகிறது. அதன் படபிடிப்புக்காக, கேரளா சென்றிருக்கும் விஜய் சேதுபதி சமீபத்தில் கேரள பத்திரிகை ஒன்றுக்கு அளித்த பேட்டியில், சாதியை ஒழிப்பது குறித்து பேசியுள்ளார்.

அதில் சாதியை ஒழிக்க வேண்டும் என்றால், எல்லோரும் கல்வியில் முன்னேற்றம் அடைய வேண்டும். காதல் திருமணம் செய்து கொள்ள வேண்டும். இப்படி செய்வதன் மூலம்தான், சாதி ஒழியும். மேலும் பெண்களுக்கு எதிரான பாலியல் தொல்லைகள், எந்தத் துறையில் இருந்தாலும் அது தவறுதான். பெண்கள், எந்த இடத்தில் பாதிக்கப்பட்டாலும், அவர்களுக்கு நியாயம் கட்டாயம் வழங்கப்பட வேண்டும். இவ்வாறு நடிகர் விஜய் சேதுபதி கூறினார்.