ஒரே சமயத்தில் 4 மொழிகளில் அறிமுகமாகும் தன்ஷிகா!

நடிகை தன்ஷிகா ஒரே சமயத்தில் 4 மொழி படங்களில் அறிமுகமாகிறார்.

சிறு சிறு படங்களில் நாயகியாக நடித்து வந்த தன்ஷிகா ‘பேராண்மை’ படத்தின் மூலம் அனைவரின் கவனத்தையும் பெற்றார். அதன் பின் பல படங்களில் நடித்தார். சமீபத்தில் ரஜினியுடன் ‘கபாலி’ படத்தில் நடித்த பிறகு அதிகமாக பிரபலமானார். இதுவரை பிற மொழிப் படங்களில் நடிக்காமல் இருந்த தன்ஷிகா இந்த ஆண்டு மலையாளம், இந்தி, தெலுங்கு, கன்னட படங்களில் அறிமுகமாகிறார்.

இதுகுறித்து தன்ஷிகா கூறியதாவது: ‘காலக்கூத்து’ என்ற படத்தில் மதுரை பெண்ணாக நடிக்கிறேன். கல்லூரிக்கு செல்லும் பெண்ணாக நடித்திருக்கிறேன். இதிலும் எனக்கு கலையரசன் தான் ஜோடியாக நடிக்கிறார். இந்தப் படத்தை நாகராஜ் என்ற புதுமுக இயக்குனர் இயக்குகிறார்.

அடுத்ததாக இயக்குநர் மீரா கதிரவனின் இயக்கத்தில் ‘விழித்திரு’- படத்தில் வட சென்னை பெண்ணாக நடித்திருக்கிறேன். முதன்முதலில் இந்த படத்தில் காமெடி கலந்து நடித்திருக்கிறேன். அடுத்ததாக பிஜோய் நம்பியார் இயக்கும் ‘சோலோ’ என்ற படத்தில் ஒரு நல்ல கேரக்டரில் நடித்திருக்கிறேன். அதில் கண் பார்வையற்ற பெண்ணாகவும், நடனக் கலைஞராகவும் சவாலான கேரக்டரில் நடித்திருக்கிறேன்.

எனக்கு ஜோடியாக துல்கர் சல்மான் நடித்திருக்கிறார். தெலுங்கில் ‘வாலுஜடா’ என்ற படத்திலும், கன்னடத்தில் சுனில் குமார் தேசாய் என்பவரின் இயக்கத்தில் உருவாகும் ‘உத்கர்ஷா’ என்ற படத்திலும் நடிக்க ஒப்புக்கொண்டிருக்கிறேன்’’ என்றார் தன்ஷிகா.