சென்னை டூ மதுரை பொண்ணு: கலக்கும் நடிகை இந்துஜா

மேயாத மான் படத்தைத் தொடர்ந்து இந்துஜாவுக்கு பில்லா பாண்டி படத்தில் நடிக்கும் வாய்ப்பு கிடைத்துள்ளது.

குறும்பட இயக்குனரான ரத்னகுமார் இயக்கிய முதல் படம் மேயாத மான். கார்த்திக் சுப்புராஜ் இப்படத்தை தயாரித்திருந்தார். வைபவ், விவேக் பிரசன்னா, பிரியா பவானி ஷங்கர், இந்துஜா ஆகியோரது நடிப்பில் நார்த் மெட்ராஸ் பின்னணியில் உருவான படம்.

வழக்கமான ஒருதலைக் காதல் கதையை நட்பு, இசை, அண்ணன் – தங்கை பாசம் என்று பல வித உணர்வுகளுடன் பின்னிப் பிணைந்த திரைக்கதையுடன் எடுக்கப்பட்ட படம். வட சென்னை மக்களின் வாழ்க்கையை இப்படம் நம் கண் முன்னே கொண்டு வந்த படம். இப்படத்தில் வைபவின் தங்கையாக நடித்தவர் இந்துஜா. இவர் வேலூரைச் சேர்ந்தவர். மீடியாவின் மீது அதிக ஆர்வம் கொண்ட இவர், மேயாத மான் படத்தின் ஆடிஷனில் கலந்து கொண்டு படத்தில் நடிக்கும் வாய்ப்பைப் பெற்றார்.

இப்படத்தில் நார்த் மெட்ராஸ் பெண்ணாக நைட்டியை மடித்துக் கட்டிக்கொண்டு, அனபெலே பாட்டுக்கு இவர் போட்ட ஆட்டத்தை அனைவரும் ரசித்தனர். இதில், ஏரியா கெத்து காட்டுவதும், அண்ணனின் காதலியைப் பார்க்க ஆசைப்படுவது அண்ணனின் நண்பனை ஒரு தலையாக காதலித்து அதை மறைத்து உருகுவது என்று ஆச்சர்யமான நடிப்பை வெளிப்படுத்தியுள்ளார். அதிலும், தங்கச்சி தங்கச்சின்னு சொல்லிகிட்டு என்னை தொடாத என சீறுவதிலும், அவன் தங்கச்சின்னு சொல்றது தான் பிரச்சனையே என அண்ணனிடம் வெறுப்பில் சொல்வதும்.. பக்கா பக்கத்துவீட்டு பெண்.

இதனால் தான் என்னவோ படம் வெளிவருவதற்கு முன்பே அடுத்த வாய்ப்பு கிடைத்தது. தயாரிப்பாளர் ஆர்.கே.சுரேஷ் ஹீரோவாக நடிக்கும் பில்லா பாண்டி படத்தில் நடிக்கிறார் இந்துஜா. இப்படத்தில் சாந்தினியும் நடிக்கிறார். மேயாத மான் படத்தில் சென்னை பெண்ணாக கலக்கிய இந்துஜா, பில்லா பாண்டியில் மதுரைக்காரப் பெண்ணாக கலக்கயிருக்கிறார் என்பது குறிப்பிடத்தக்கது.