இந்தியாவில் பாஜக ஆளும் மாநிலங்களில் மாட்டிறைச்சி தொடர்பான விவகாரத்தில் சர்ச்சை எழுவது வழக்கமாகி இருக்கிறது. மாட்டிறைச்சி வைத்திருப்பதாக கூறி அப்பாவி மக்களை அடித்து கொல்லும் கதையும் தொடர் கதையாக உள்ளது. இந்நிலையில் மாட்டிறைச்சி தொடர்பாக நடிகை நிகிலா கூறியுள்ள கருத்து பெரும் பரபரப்பை ஏற்படுத்தியுள்ளது.
மலையாள சினிமாவில் கடந்த 2009 ஆம் ஆண்டு அறிமுகமானவர் நடிகை நிகிலா விமல். தொடர்ந்து பல முன்னணி நடிகர்களுடன் இணைந்து நடித்துவரும் இவர் கடந்த 2016 ஆம் ஆண்டு வசந்தமணி இயக்கத்தில் வெளியான 'வெற்றிவேல்' படத்தில் நடிகர் சசிக்குமாருக்கு ஜோடியாக நடித்து தமிழ் சினிமாவில் அறிமுகமானார்.
அண்மைச் செய்திகளை உடனடியாக படிக்க கூகுள் நியூஸில் தமிழ் சமயம் இணையதளத்தை பின் தொடரவும்
அதனை தொடர்ந்து தொடர்ந்து கிடாரி, தம்பி, ரங்கா உள்ளிட்ட பல படங்களில் நடித்தார். இவர் தற்போது, ‘ஜோ ஜோ’ என்ற மலையாளத் படத்தில் நடித்திருக்கிறார். கேரளாவில் மாபெரும் வெற்றி பெற்றிருக்கும் இந்தப் படத்தின் விளம்பரத்துகாக தனியார் இணைய ஊடகம் ஒன்றுக்கு பேட்டி அளித்தார் நிகிலா.
அப்போது ஊடகத்திடம் பேட்டியளித்த நிகிலா, 'பசுவை வெட்டக்கூடாது என்பது தற்போது வந்திருக்கும் நடைமுறை. அது ஒரு பிரச்சினை இல்லை. விலங்குகளை வெட்டக்கூடாது என்றால் எந்த விலங்கையும் வெட்டக்கூடாது. பசுவுக்கு என்று தனித்துவமாக எதுவும் இல்லை. வெட்டலாம் என்றால் அனைத்தையும் வெட்டலாம். பசுவை மட்டும் வெட்டக்கூடாது, கோழியை வெட்டலாம் என்றால் அது எந்தவகையில் நியாயம்.
கோழி பறவையாக இருந்தாலும் அதுவும் ஒரு உயிர்தானே. பசுவுக்கு ஒரு நியாயம் கோழிக்கு ஒரு நியாயமா? அசைவம் சாப்பிடக்கூடாது என்றால் கோழி, மீன் போன்றவைகளையும் சாப்பிடக்கூடாது. முழுமையான சைவமாக மாற வேண்டும். நான் அனைத்து வகை உணவுகளையும் சாப்பிடுவேன். ஒன்றை மட்டும் சாப்பிடக்கூடாது என்றால் அதை என்னால் ஏற்றுக்கொள்ள முடியாது” என்று தெரிவித்துள்ளார். அவரின் இந்தப்பேட்டி தற்போது வைரலாகி வருகிறது.