டப்பிங் குயின் குரலில் பொங்கலுக்கு 3 திரைப்படம்!

மாஸ்டர் படத்தில் விஜய்க்கு ஜோடியாக மாளவிகா மோகனன் நடித்துள்ளார். ஈஸ்வரன், பூமி ஆகிய இரு படங்களில் ஹீரோயினாக நிதி அகர்வால் நடித்துள்ளார். இவர்கள் இருவருக்கும் மூன்று படத்திலும் பின்னணி குரல் கொடுத்திருக்கிறார் ரவீனா ரவி.

சினிமாவில் பாடல்கள், நடிப்பு, கதை போன்றவை எந்த அளவிற்கு முக்கியமோ அந்த அளவிற்கு வசனங்களும் முக்கியம். அந்த வசனத்திற்கு அழகு சேர்ப்பது வாய்ஸ். ஒரு காட்சியில் வசனங்கள் தான் மிகப்பெரிய உணர்ச்சியை உருவாக்குகிறது. அதுவும் தமிழ் சினிமாவில் பல வசனங்கள் ரசிகர்கள் மனதில் நீங்காத இடம் பிடித்துள்ளது என்பது அனைவரும் அறிவோம்.

திரையரங்குகளில் படங்கள் பார்க்கும்போது, நடிகை, நடிகர்கள் குரல் கேட்டதும் அரங்கமே அதிரும். ஆனால், உண்மையில் அது நடிகர்களின் சொந்த குரலா என்பது கூட நமக்கு தெரியாது. அந்த அளவிற்கு படத்தின் வசனங்களுக்கு அழகு சேர்க்கிறது வாய்ஸ். தமிழ் தெரியாத வேறு மொழி நடிகர்கள் கூட தைரியமாய் நடிக்க ஒரு முக்கிய காரணம் இந்த டப்பிங்தான்.


அந்த வகையில் ரவீனா, ‘ஐ’ படத்தில் ‘எமி ஜாக்சன்’, கத்தி படத்தில் ‘சமந்தா’, தெறி படத்தில் ‘எமி ஜாக்சன்’, வேலையில்லா பட்டதாரி படத்தில் ‘அமலா பால்’ என பல முன்னணி நடிகைகளுக்கு வாய்ஸ் கொடுத்துள்ளார். அதுமட்டுமின்றி, நயன்தாரா நடித்த பல மலையாளம் படத்திற்கும் இவர்தான் வாய்ஸ் கொடுத்துள்ளார்.


மேலும், விமர்சன ரீதியாக பல பாராட்டுகளைக் குவித்த 'ஒரு கிடாரியின் கருணை மனு' மற்றும் காவல்துறை உங்கள் நண்பன் படங்களில் ஹீரோயினாக நடித்தவர் ரவீனா என்பது குறிப்பிடத்தக்கது.