அப்பாவை அடுத்து பெரிய குடும்பத்து மகன் நடிகருக்கு கொரோனா

திரையுலகை சேர்ந்தவர்களுக்கு அதிலும் குறிப்பாக படப்பிடிப்புகளில் கலந்து கொள்பவர்களுக்கு கொரோனா வைரஸ் பாதிப்பு ஏற்படுவது அதிகரித்து வருகிறது. தெலுங்கு நடிகர் ராம் சரண் தன் அப்பா சிரஞ்சீவி நடித்து வரும் ஆச்சார்யா படத்தை தயாரித்து வருகிறார். கடந்த சில நாட்களுக்கு முன்பு அவர் படப்பிடிப்பு தளத்தில் இருக்கும் புகைப்படங்கள் வெளியாகி வைரலாகின. இந்நிலையில் ராம் சரணுக்கு கொரோனா வைரஸ் பாதிப்பு ஏற்பட்டுள்ளது.

இது குறித்து ராம் சரண் சமூக வலைதளத்தில் கூறியிருப்பதாவது,
எனக்கு கோவிட் 19 பாசிட்டிவ் என்று வந்துள்ளது. எந்த அறிகுறியும் இல்லை. வீட்டில் என்னை தனிமைப்படுத்திக் கொண்டேன். விரைவில் குணமாகிவிடுவேன் என்று நம்புகிறேன். கடந்த சில நாட்களாக என்னுடன் இருந்தவர்கள் பரிசோதனை செய்து கொள்ளுமாறு கேட்டுக் கொள்கிறேன். விரைவில் மேலும் அப்டேட் கொடுக்கிறேன் என தெரிவித்துள்ளார்.

ராம் சரணின் ட்வீட்டை பார்த்த திரையுலகினரும், ரசிகர்களும் அவர் விரைவில் குணமடைய பிரார்த்தனை செய்வதாக தெரிவித்துள்ளனர்.

கிறிஸ்துமஸ் பண்டிகையை தன் குடும்பத்தாருடன் சேர்ந்து கொண்டாடினார் ராம் சரண். அப்பொழுது எடுக்கப்பட்ட புகைப்படங்களை அவர் ட்விட்டரில் வெளியிட்டிருந்தார். அதை பார்த்த ரசிகர்கள் என்ன ஒரு அழகான குடும்பம் என்றார்கள். இந்நிலையில் ராம் சரணுக்கு கொரோனா பாதிப்பு என்றால் கிறிஸ்துமஸ் கொண்டாட்டத்தில் கலந்து கொண்ட மொத்த குடும்பத்தாரும் பரிசோதனை செய்ய வேண்டியிருக்கும்.
முன்னதாக ஆச்சார்யா படப்பிடிப்பில் கலந்து கொள்வதற்கு முன்பு பரிசோதனை செய்தபோது சிரஞ்சீவிக்கு கொரோனா பாதிப்பு இருப்பது தெரிய வந்தது. அவருக்கு அறிகுறிகள் எதுவும் இல்லாததால் வீட்டிலேயே தன்னை தனிமைப்படுத்திக் கொண்டார். குணமடைந்த பிறகு தன் தம்பி நாகேந்திர பாபுவின் மகள் நிஹாரிகாவின் திருமணத்தில் கலந்து கொண்டார் சிரஞ்சீவி.

சிரஞ்சீவிக்கு முன்பு நாகேந்திர பாபுவுக்கு கொரோனா வைரஸ் பாதிப்பு ஏற்பட்டது. அதில் இருந்து குணமடைந்த பிறகு அவர் பிளாஸ்மா தானம் செய்தார். அப்பொழுது எடுக்கப்பட்ட புகைப்படத்தை பார்த்த ரசிகர்கள் நாகேந்திர பாபுவை பாராட்டினார்கள் என்பது குறிப்பிடத்தக்கது.

அதற்குள் போயிட்டீங்களேணா: மாஸ்டர் பட நடிகரின் மரணத்தால் லோகேஷ் கண்ணீர்