Thalapathy 63: வில்லு படத்தைத் தொடர்ந்து தளபதிக்கு ஜோடியாகும் நயன்தாரா?

சர்கார் படத்தைத் தொடர்ந்து அட்லி இயக்கத்தில் தளபதி விஜய் நடிக்கும் புதிய படத்தில் விஜய்க்கு ஜோடியாக நயன்தாரா நடிக்கிறார் என்று தகவல் தெரிவிக்கின்றது.

இயக்குனர் ஏ.ஆர்.முருகதாஸ் இயக்கத்தில் தளபதி விஜய் நடிப்பில் கடந்த 6ம் தேதி வெளியாகி ரசிகர்களிடையே நல்ல வரவேற்பைப் பெற்ற படம் சர்கார். அரசியல் பின்னணிக் கதையை மையப்படுத்திய இப்படம் அரசியல் கட்சியினருரிடையே பெரும் தாக்கத்தை ஏற்படுத்தியது. எனினும், வசூல் ரீதியாக இப்படம் ரூ.200 கோடி வரை வசூல் குவித்துள்ளது.

இந்த நிலையில், இப்படத்தைத் தொடர்ந்து தனது 63ஆவது படத்திற்காக தளபதி விஜய் தெறி படத்தின் இயக்குனர் அட்லியுடன் 2ஆவது முறையாக இணைந்துள்ளார். இந்தக் கூட்டணியில் உருவாகும் புதிய படத்தை ஏஜிஎஸ் புரோடக்‌ஷன் நிறுவனம் தயாரிக்கிறது. தற்போது இப்படத்தின் படப்பிடிப்பு இன்று மைலாப்பூரில் உள்ள ஒரு கோயிலில் பூஜையுடன் தொடங்கியுள்ளது. இப்படத்திற்கு இசையமைப்பாளர் அனிருத் இசையமைக்கிறார் என்பது குறிப்பிடத்தக்கது.

வழக்கத்திற்கு மாறாக இப்படம், க்ரைம் – த்ரில்லர் கதையை மையப்படுத்திய படமாக உருவாகும் என்று தகவல் தெரிவிக்கின்றது. மேலும், இப்படத்தில் தளபதி விஜய் ஒரு சிபிஐ அதிகாரியாக நடிக்கிறார் என்றும் கூறப்படுகிறது.

இந்த நிலையில், இப்படத்தில் விஜய்க்கு ஜோடியாக நயன்தாரா நடிப்பார் என்று எதிர்பார்க்கப்படுகிறது. இதற்கு முன்னதாக வில்லு படத்தில் விஜய்க்கு ஜோடியாக நடித்துள்ளார் என்பது குறிப்பிடத்தக்கது. மேலும், சமந்தாவிடமும் பேச்சுவார்த்தை நடந்து வருகிறது. தெறி மற்றும் மெர்சல் ஆகிய படங்களைத் தொடர்ந்து இப்படத்தில் விஜய்க்கு ஜோடியாக சமந்தா நடிப்பார் என்று எதிர்பார்க்கப்படுகிறது.