Aishwarya Rai:‘2.0’ படத்தில் ஐஸ்வர்யா ராய்க்கு இந்த கதாபாத்திரமா?

ரஜினி நடிப்பில் உருவாகியிருக்கும் ‘2.0’ படத்தில் சனா கேரக்டரில் நடிகை ஐஸ்வர்யாராய் நடித்துள்ளதாக கூறப்படுகிறது.

இயக்குனர் ஷங்கர் இயக்கத்தில் சூப்பர் ஸ்டார் ரஜினிகாந்த் நடிப்பில் மிகப் பிரம்மாண்டமாக உருவாகியுள்ள படம் ‘2.0’. இந்தப் படத்தில் ரஜினிக்கு ஜோடியாக எமி ஜாக்சன் நடித்துள்ளார். மேலும் படத்தில் கொடூர வில்லனாக அக்ஷய் குமார் நடித்துள்ளார். இந்தப் படம் இம்மாதம் 29ம் தேதி உலகம் முழுவதும் மிக பிரம்மாண்டமாக வெளியாகவுள்ளது.

தற்போது இந்த படத்தின் புரமோஷன் உலகம் முழுவதும் நடந்து வருகிறது. இந்த நிலையில் இந்த படத்தில் ‘எந்திரன்’ படத்தில் ‘சனா’ கேரக்டரில் நாயகியாக நடித்த ஐஸ்வர்யாராய் சிறப்பு தோற்றத்தில் அதே சனா கேரக்டரில் நடித்திருப்பதாகவும், இதுவரை இந்த தகவலை ரகசியமாக வைத்திருந்த படக்குழு தற்போது இந்த செய்தியை உறுதிப்படுத்தியுள்ளது.

ஆனால் அதே நேரத்தில் நடிகை ஐஸ்வர்யாராய் ‘2.0’ படத்திற்காக ஒருநாள் கூட கால்ஷீட் கொடுக்கவில்லை என்றும், ‘எந்திரன்’ படத்தில் நீளம் காரணமாக வெட்டப்பட்ட ஐஸ்வர்யாராயின் சில காட்சிகளை இந்த படத்தில் ஷங்கர் இணைத்துள்ளார் என்று தெரிகிறது.