வலிமை ஷூட்டிங்.. அஜித் போட்டிருக்கும் மாஸ்டர் பிளான் இது தான்?

அஜித் தற்போது ஹெச். வினோத் இயக்கத்தில் வலிமை படத்தில் அடுத்த வருகிறார். கொரோனா காரணமாக இதன் ஷூட்டிங் பாதிக்கப்பட்டு இருக்கிறது. ஐதராபாத்தில் உள்ள ஒரு ஸ்டுடியோவில் செட் அமைக்கப்பட்டு வலிமை படப்பிடிப்பு பணிகள் தொடங்கி நடைபெற்று வந்தது. அதனை தொடர்ந்து சென்னையில் ஷூட்டிங் நடந்தது. அதற்குப் பிறகு கொரோனா வைரஸ் நாடு முழுவதும் பரவத் தொடங்கியதும் முழு ஊரடங்கு அரசால் பிறப்பிக்கப்பட்டது. அதன் காரணமாக வலிமை பாதியிலேயே நிறுத்தப்பட்டது. ஆறு மாதங்களுக்குப் பிறகு தற்போது படப்பிடிப்பு தொடங்க அரசு அனுமதி அளித்திருந்தாலும், பல பெரிய படங்கள் ஷூட்டிங் இன்னும் துவங்காமல் தான் இருக்கின்றன.

வலிமை படத்தின் ஷூட்டிங்கும் அடுத்த வருடம் தான் துவங்கும் என எதிர்பார்க்கப்படுகிறது. இந்த வருட தீபாவளி பண்டிகைக்காக வலிமை வெளியாகும் என முதலில் அறிவிக்கப்பட்டு இருந்தாலும், கொரோனா காரணமாக இன்னும் படப்பிடிப்பில் பெரிய பகுதி எடுக்கப்பட வேண்டி இருப்பதால் தீபாவளி ரிலீஸில் இருந்து வேறு தேதிக்கு மாற்றப்பட்டுள்ளது. அடுத்த வருடம் கோடை விடுமுறைக்காக படம் வெளியாகலாம் என எதிர்பார்க்கப்படுகிறது. இந்நிலையில் இந்த படம் பற்றிய ஒரு புதிய தகவல் வெளியாகி இருக்கிறது. இன்னும் 50 முதல் 60 நாட்கள் வரை ஷூட்டிங் நடத்தினால் தான் படப்பிடிப்பு நிறைவு பெறும் எனவும், அதில் அஜித்தின் பகுதி மட்டுமே 30 நாட்கள் வரை நடைபெறும் எனவும் கூறப்படுகிறது.

அஜித் வலிமை ஷூட்டிங்கில் ஜனவரியிலிருந்து பங்கேற்க முடிவு எடுத்திருக்கிறார் எனவும் தெரிகிறது. ஜனவரியில் துவங்கும் ஷூட்டிங் பிப்ரவரியில் முடிக்க அஜித் திட்டமிட்டிருக்கிறார். அதன் பிறகு ஏப்ரல் மாதத்தில் தன்னுடைய 61 வது படம் பற்றிய அறிவிப்பை வெளியிடுவார் என்றும் எதிர்பார்க்கப்படுகிறது.

அஜித்தின் 61 வது படத்தை சுதா கொங்கரா இயக்கவுள்ளார் என்று ஒரு வாரத்திற்கு முன்பு செய்தி வெளியானது குறிப்பிடத்தக்கது. அந்த படத்தை ஏஜிஎஸ் நிறுவனம் தயாரிக்கிறது என்றும் கூறப்பட்டது. ஆனால் ஏஜிஎஸ் என்டர்டெயின்மென்ட் நிறுவனத்தின் அர்ச்சனா கல்பாத்தி பதிவிட்டிருந்த ட்விட்டில் தாங்கள் எந்த படத்தையும் இதுவரை முடிவு செய்யவில்லை எனக் கூறி விளக்கம் அளித்திருந்தார்.

சுதா கொங்கரா இதற்கு முன்பு இறுதிச்சுற்று மற்றும் சூரரைப் போற்று ஆகிய படங்களை இயக்கியிருக்கிறார். கோலிவுட்டின் முன்னணி இயக்குநர்களில் ஒருவராக இருக்கும் அவர் அஜித் உடன் இணைகிறார் என்ற செய்தி பரவியது ரசிகர்கள் கொண்டாட வைத்தது. ஆனால் அந்த செய்தி முற்றிலும் வதந்தி என ஏஜிஎஸ் நிறுவனம் விளக்கம் அளித்திருந்தது. ஆனால் சுதா கொங்கரா இதுவரை அது பற்றி எந்த ஒரு விளக்கமோ மறுப்போ தெரிவிக்கவில்லை என்பது குறிப்பிடத்தக்கது. சுதா கொங்கரா இயக்கத்தில் சூர்யா நடித்திருக்கும் சூரரைப் போற்று படம் வரும் அக்டோபர் 30ஆம் தேதி நேரடியாக ஓடிடி தளத்தில் வெளிவருவது குறிப்பிடத்தக்கது.

வலிமை படத்தில் அஜீத் போலீஸ் அதிகாரியாக நடிக்கிறார். படத்தில் அதிக அளவு ஆக்ஷன் மற்றும் சேசிங் காட்சிகள் இருக்கும் என கூறப்படுகிறது. இந்த படத்திற்காக ஒரு ஸ்பெஷலான பைக் ஒன்றையும் படக்குழு உருவாகியிருக்கிறது என்றும் கூறப்படுகிறது.

ஹீரோயினாக பாலிவுட் நடிகை ஹுமா குரேஷி நடித்து வருகிறார். மேலும் வில்லனாக நடிகர் கார்த்திகேயா நடிக்கிறார். அவர் இதற்கு முன்பு RX100 என்ற படத்தின் மூலம் புகழ் பெற்றவர்.